દમણ, 03 મે (હિ.સ.) : દમણના દુનેઠા વિસ્તારમાં આવેલ જગન્નાથ મંદિર દુનેઠા ખાતે વૈશાખ પૂર્ણિમા પર્વ હર્ષોલ્લાસ અને ભક્તિમય માહોલમાં ઉજવાયો હતો.

શ્રી જગન્નાથ મંદિર સેવા સંસ્થાન દમણના તમામ ગ્રુપ સભ્યો પોતાના પરિવાર સાથે ઉપસ્થિત રહ્યા હતા. દર મહિને ઉજવાતા પૂર્ણિમા મહોત્સવની પરંપરા મુજબ ભગવાન જગન્નાથને સમર્પિત આ કાર્યક્રમ મંદિર પરિસરમાં યોજાયો હતો, જેમાં મોટી સંખ્યામાં ભક્તોએ હાજરી આપી હતી.

સંસ્થાની અધ્યક્ષ અંજલિ જગન્નાથ નંદા બહેને ભક્તજનોની ઉપસ્થિતિની પ્રશંસા કરી અને તમામ બાળકોને આશીર્વાદ આપ્યા હતા. આ પ્રસંગે આવનારા ભગવાન જગન્નાથ મહાપ્રભુના જન્મોત્સવ અંગે પણ ચર્ચા કરવામાં આવી હતી. તેમણે જણાવ્યું કે સંસ્થાનો મુખ્ય હેતુ જગન્નાથ ચિંતન અને ભક્તિનો વિકાસ, આધ્યાત્મિકતાનો પ્રસાર તેમજ માનસિક અને આધ્યાત્મિક જાગૃતિમાં વધારો કરવો છે.

કાર્યક્રમ સાંજે 8:30 વાગ્યે પૂજા-અર્ચના, કીર્તન અને સંધ્યા આરતીથી શરૂ થઈ ચંદ્રપૂજન અને મહાપ્રસાદ સાથે પૂર્ણ થયો હતો. જગન્નાથ પ્રેમીઓએ ઉત્સાહપૂર્વક ભાગ લઈને મહાપ્રસાદનો લાભ લીધો હતો. નોંધનીય છે કે પૂર્ણિમા મહાપ્રસાદ સેવા એક ભક્ત દ્વારા ગુપ્ત રીતે આપવામાં આવી હતી.

આ પ્રસંગે દમણ મ્યુનિસિપલના પૂર્વ કાઉન્સિલર ચંદ્રગીરી ટંડેલ ઉર્ફે ચકુભાઈ પણ ઉપસ્થિત રહી સહયોગ આપ્યો હતો. સાથે જ મેડિકલ કોર્સ પૂર્ણ કરીને પરત ફરેલ મનાલી મિશ્રાનું પણ સ્વાગત કરવામાં આવ્યું હતું.

અંતમાં મંદિર પરિચાલન સમિતિ દ્વારા ઉપસ્થિત તમામ ભક્તોનો હાર્દિક આભાર વ્યક્ત કરવામાં આવ્યો હતો.

---------------

હિન્દુસ્થાન સમાચાર / Krishna Ghanshyam Jha