કચ્છ, 04 મે (હિ.સ.) : કચ્છ જિલ્લામાં શિક્ષણક્ષેત્રે સતત વધતી ગુણવત્તાનો વધુ એક મજબૂત પુરાવો ધોરણ-12 બોર્ડ પરીક્ષા 2026ના જાહેર થયેલા પરિણામોમાં જોવા મળ્યો છે. જિલ્લા શિક્ષણાધિકારી કચેરી, ભુજ દ્વારા જાહેર કરાયેલા આંકડા મુજબ કચ્છ જિલ્લાએ વિજ્ઞાન તથા સામાન્ય બંને પ્રવાહમાં ગુજરાત માધ્યમિક અને ઉચ્ચતર માધ્યમિક શિક્ષણ બોર્ડના સરેરાશ પરિણામને પાછળ મૂકી પ્રભાવશાળી પ્રદર્શન કર્યું છે. ખાસ કરીને છેલ્લા ચાર વર્ષના પરિણામોની સરખામણીએ કચ્છમાં સતત સુધરતી શૈક્ષણિક પ્રગતિ સ્પષ્ટ રીતે સામે આવી છે.

ધોરણ-12 વિજ્ઞાન પ્રવાહના પરિણામ પર નજર કરીએ તો માર્ચ 2023માં કચ્છ જિલ્લાનું પરિણામ 70.88 ટકા હતું, જે વર્ષ 2024માં વધીને 84.32 ટકા થયું, 2025માં 83.23 ટકા નોંધાયું અને હવે 2026માં નોંધપાત્ર ઉછાળા સાથે 85.64 ટકા સુધી પહોંચી ગયું છે. એટલે કે માત્ર એક વર્ષમાં જ 2.41 ટકાનો વધારો નોંધાયો છે. તેની સામે બોર્ડનું કુલ પરિણામ 84.33 ટકા જાહેર થયું છે. આ રીતે કચ્છ જિલ્લો બોર્ડની સરખામણીએ 1.31 ટકા આગળ રહ્યો છે. આ આંકડો માત્ર સંખ્યાત્મક સિદ્ધિ નથી, પરંતુ જિલ્લાના ગ્રામ્ય અને અંતરિયાળ વિસ્તારોમાં પણ વિજ્ઞાન શિક્ષણની ગુણવત્તા મજબૂત બની રહી છે તેનો સંકેત આપે છે.

સામાન્ય પ્રવાહમાં પણ કચ્છ જિલ્લાએ ગૌરવપૂર્ણ સિદ્ધિ હાંસલ કરી છે. માર્ચ 2023માં જિલ્લાના સામાન્ય પ્રવાહનું પરિણામ 84.59 ટકા હતું. 2024માં તે વધીને 94.23 ટકા થયું, 2025માં 95.05 ટકા અને 2026માં 96.21 ટકા સુધી પહોંચી ગયું છે. ગયા વર્ષની સરખામણીએ તેમાં 1.16 ટકાનો વધારો નોંધાયો છે. જ્યારે બોર્ડનું સામાન્ય પ્રવાહનું પરિણામ 92.71 ટકા જાહેર થયું છે, જેની સામે કચ્છ જિલ્લો 3.50 ટકા આગળ રહ્યો છે. સામાન્ય પ્રવાહમાં જિલ્લાનો આ તફાવત દર્શાવે છે કે માત્ર શહેરી જ નહીં પરંતુ તાલુકા અને ગામડાની શાળાઓએ પણ ગુણવત્તાયુક્ત શિક્ષણમાં નોંધપાત્ર યોગદાન આપ્યું છે.

કચ્છ જિલ્લામાં સતત સુધરતા પરિણામ પાછળ શિક્ષકોની મહેનત, શાળાઓમાં વધતી શૈક્ષણિક મોનિટરિંગ વ્યવસ્થા, જિલ્લા શિક્ષણ તંત્રની અસરકારક માર્ગદર્શન પદ્ધતિ અને વિદ્યાર્થીઓમાં વિકસેલી સ્પર્ધાત્મક તૈયારી મહત્વના પરિબળ તરીકે સામે આવ્યા છે. ખાસ કરીને બોર્ડ પરીક્ષા પૂર્વે લેવાતા રિવિઝન કેમ્પ, વિષયવાર માર્ગદર્શન, ટેસ્ટ શ્રેણી અને નબળા વિદ્યાર્થીઓ માટે ખાસ કોચિંગ જેવી પહેલો હવે અસરકારક સાબિત થઈ રહી છે.

આ વર્ષે A1 ગ્રેડ મેળવનાર વિદ્યાર્થીઓની સંખ્યામાં થયેલો જંગી વધારો કચ્છના પરિણામને વધુ વિશેષ બનાવે છે. સામાન્ય પ્રવાહમાં વર્ષ 2024માં 136 વિદ્યાર્થીઓએ A1 ગ્રેડ મેળવ્યો હતો, જે 2025માં 150 થયો અને હવે 2026માં સીધો 204 સુધી પહોંચ્યો છે. એટલે કે એક વર્ષમાં 54 વિદ્યાર્થીઓનો વધારો નોંધાયો છે. વિજ્ઞાન પ્રવાહમાં પણ 2024માં માત્ર 2 વિદ્યાર્થીઓ A1 ગ્રેડમાં હતા, જે 2025માં 17 થયા અને હવે 2026માં 20 વિદ્યાર્થીઓએ A1 ગ્રેડ સાથે જિલ્લાને ગૌરવ અપાવ્યું છે. A1 ગ્રેડમાં આ વૃદ્ધિ માત્ર પાસ ટકામાં વધારો નથી, પરંતુ ગુણવત્તાસભર અને પ્રતિસ્પર્ધી શિક્ષણની દિશામાં કચ્છ આગળ વધી રહ્યો છે તેવું સ્પષ્ટ દર્શાવે છે.

કચ્છ જેવા વિશાળ ભૂગોળ ધરાવતા જિલ્લામાં, જ્યાં અનેક ગામો હજુ પણ શૈક્ષણિક સુવિધાઓની દૃષ્ટિએ પડકારજનક ગણાય છે, ત્યાં આવી પ્રગતિ રાજ્ય સ્તરે ચર્ચાનો વિષય બની શકે તેવી છે. શિક્ષણવિદોના મતે આ પરિણામો સૂચવે છે કે જિલ્લાના વિદ્યાર્થીઓ હવે માત્ર પાસ થવામાં નહીં પરંતુ મેરિટ અને ગુણવત્તાની હરીફાઈમાં પણ આગળ વધી રહ્યા છે.

જિલ્લા શિક્ષણ તંત્ર માટે આ પરિણામ નવી જવાબદારી પણ લઈને આવ્યું છે. આગામી વર્ષોમાં 100 ટકા ગુણવત્તા, વધુ મેરિટ, વધુ A1 ગ્રેડ અને સ્પર્ધાત્મક પરીક્ષાઓમાં પણ જિલ્લામાંથી વિશેષ પ્રદર્શન થાય તે માટે હવે વધુ સુવ્યવસ્થિત આયોજન થવાની સંભાવના છે. હાલ માટે તો ધોરણ-12 બોર્ડ પરિણામ 2026એ એક વાત સાબિત કરી દીધી છે — કચ્છ હવે માત્ર ભૌગોલિક રીતે વિશાળ જિલ્લો નથી, પરંતુ શૈક્ષણિક રીતે પણ રાજ્યના અગ્રણી જિલ્લાઓમાં પોતાનું સ્થાન મજબૂત બનાવી રહ્યો છે.

---------------

હિન્દુસ્થાન સમાચાર / Rohit R. Padhiyar