ભાવનગર, 04 મે (હિ.સ.)પાલીતાણા કૃષિ ઉપજ બજાર સમિતિ (APMC) ખાતે માર્ગ સુરક્ષાને વધુ મજબૂત બનાવવાના હેતુથી એક મહત્વપૂર્ણ અભિયાન યોજાયું હતું. આ અભિયાન અંતર્ગત અંદાજિત 170 જેટલા વાહનોમાં રેડિયમ સ્ટિકર લગાવવામાં આવ્યા હતા, જેથી રાત્રિના સમયે વાહનો સરળતાથી દેખાઈ શકે અને અકસ્માતોની શક્યતા ઘટાડી શકાય.

આ કાર્યક્રમ દરમિયાન ટ્રાફિક વિભાગ દ્વારા ડ્રાઈવર મિત્રો માટે માર્ગદર્શક માહિતી સત્ર પણ યોજાયું હતું. જેમાં ટ્રાફિકના નિયમોનું પાલન કેટલું જરૂરી છે તે અંગે વિગતવાર સમજ આપવામાં આવી. ખાસ કરીને ઓવર સ્પીડિંગ, સીટ બેલ્ટનો ઉપયોગ, હેલ્મેટ પહેરવાનું મહત્વ અને મોબાઈલનો ઉપયોગ ટાળવા જેવી બાબતો પર ભાર મૂકવામાં આવ્યો હતો.

સાથે સાથે ‘રાહવીર યોજના’ વિશે પણ ડ્રાઈવરોને માહિતગાર કરવામાં આવ્યા. આ યોજના અંતર્ગત માર્ગ અકસ્માતમાં ઘાયલ વ્યક્તિને સમયસર હોસ્પિટલ પહોંચાડનાર વ્યક્તિને પ્રોત્સાહનરૂપ સહાય આપવામાં આવે છે. વધુમાં, ‘PM-Raahat યોજના’ વિશે માહિતી આપી અકસ્માત પીડિતોને મળતી આર્થિક સહાય વિશે સમજાવવામાં આવ્યું.

આ અભિયાનનો મુખ્ય ઉદ્દેશ ડ્રાઈવર મિત્રો વચ્ચે જાગૃતિ ફેલાવી માર્ગ અકસ્માતોમાં ઘટાડો લાવવાનો હતો. APMC ખાતે આવતા વાહનચાલકો દ્વારા પણ આ પહેલનું સ્વાગત કરવામાં આવ્યું અને તેમણે ટ્રાફિક નિયમોનું પાલન કરવાની પ્રતિબદ્ધતા વ્યક્ત કરી.

આ રીતે પાલીતાણા APMC ખાતે યોજાયેલ આ અભિયાન માર્ગ સુરક્ષા માટે એક સકારાત્મક પગલું સાબિત થયું છે, જે ભવિષ્યમાં અકસ્માતોને અટકાવવામાં મદદરૂપ બનશે.

---------------

હિન્દુસ્થાન સમાચાર / GONDALIYA DISHANT