કચ્છ, 14 જૂન (હિ.સ.) : ભચાઉ તાલુકાના મોટી ચીરઈ ગામે ભારતીય જનતા પાર્ટી દ્વારા સેવા સેતુ કાર્યક્રમનું આયોજન કરવામાં આવ્યું હતું, જેમાં કેન્દ્ર અને રાજ્ય સરકારની વિવિધ જનકલ્યાણકારી યોજનાઓનો લાભ ગ્રામજનો સુધી સરળતાથી પહોંચાડવાનો પ્રયાસ કરવામાં આવ્યો હતો. કાર્યક્રમમાં મોટી સંખ્યામાં ગામલોકોએ હાજરી આપી સરકારી સેવાઓ અને યોજનાઓ અંગેની માહિતી મેળવી તેમજ વિવિધ લાભોનો લાભ લીધો હતો.

કાર્યક્રમનું મુખ્ય આકર્ષણ ગાંધીધામના ધારાસભ્ય માલતીબેન મહેશ્વરીની ઉપસ્થિતિ રહી હતી. તેમના માર્ગદર્શન હેઠળ યોજાયેલા આ કાર્યક્રમમાં અનેક વિભાગોના અધિકારીઓ અને કર્મચારીઓએ હાજર રહી લોકોને યોજનાઓ અંગે માર્ગદર્શન આપ્યું હતું. ગ્રામ્ય વિસ્તારોમાં વસતા નાગરિકોને સરકારી કચેરીઓના ધક્કા ખાવા ન પડે અને જરૂરી સેવાઓ તેમના ગામે જ ઉપલબ્ધ બને તેવા હેતુથી સેવા સેતુ કાર્યક્રમનું આયોજન કરવામાં આવ્યું હતું.

આ પ્રસંગે કચ્છ જિલ્લા પંચાયતના પૂર્વ પ્રમુખ જનકસિંહ જાડેજા, ભચાઉ ખેતીવાડી બજાર સમિતિના પ્રમુખ વાઘુભા જાડેજા, જિલ્લા પંચાયતના સભ્યો, તાલુકા પંચાયતના પ્રતિનિધિઓ, સ્થાનિક આગેવાનો અને વિવિધ સમાજના આગેવાનો ઉપસ્થિત રહ્યા હતા. ઉપરાંત તાલુકા પંચાયત, મામલતદાર કચેરી, પીજીવીસીએલ, ખેતીવાડી વિભાગ સહિતના વિવિધ સરકારી વિભાગોના અધિકારીઓ અને કર્મચારીઓએ લોકોને જરૂરી માહિતી અને માર્ગદર્શન પૂરું પાડ્યું હતું.

કાર્યક્રમ દરમિયાન અનેક અરજદારોને સરકારી યોજનાઓ અંતર્ગત લાભો મંજૂર કરવામાં આવ્યા હતા, જ્યારે અન્ય લાભાર્થીઓની અરજીઓ પણ સ્વીકારવામાં આવી હતી. ગામના લોકોમાં યોજનાઓ પ્રત્યે જાગૃતિ વધે અને તેઓ સરકારની કલ્યાણકારી સેવાઓનો વધુમાં વધુ લાભ લઈ શકે તે માટે વિશેષ માર્ગદર્શન આપવામાં આવ્યું હતું.

મોટી ચીરઈ ગામે યોજાયેલા આ સેવા સેતુ કાર્યક્રમમાં રાજકીય આગેવાનો, કાર્યકરો અને ગ્રામજનોની નોંધપાત્ર ઉપસ્થિતિ જોવા મળી હતી, જેના કારણે સમગ્ર કાર્યક્રમ લોકભાગીદારી અને જનસેવાના ઉત્તમ ઉદાહરણ તરીકે સફળ રહ્યો હતો. કાર્યક્રમના અંતે આયોજકો દ્વારા ઉપસ્થિત મહાનુભાવો, અધિકારીઓ અને ગ્રામજનોનો આભાર વ્યક્ત કરવામાં આવ્યો હતો.

---------------

હિન્દુસ્થાન સમાચાર / Rohit Ramjibhai Padhiyar