કચ્છ, 27 જૂન (હિ.સ.) :ગાંધીધામ શહેરમાં નશીલા પદાર્થોના ગેરકાયદેસર વેપાર સામે પૂર્વ કચ્છ પોલીસ દ્વારા હાથ ધરાયેલી ઝુંબેશ અંતર્ગત ગાંધીધામ એ-ડિવિઝન પોલીસે નોંધપાત્ર સફળતા મેળવી છે. ખાનગી બાતમીના આધારે હાથ ધરાયેલી કાર્યવાહીમાં એક વ્યક્તિને આશરે બે ગ્રામ જેટલા હેરોઈન સાથે ઝડપી પાડવામાં આવ્યો છે, જ્યારે આ કેસમાં સંડોવાયેલા અન્ય એક આરોપીને વોન્ટેડ જાહેર કરી તેની શોધખોળ શરૂ કરવામાં આવી છે.

સરહદી રેન્જ ભુજ-કચ્છના પોલીસ મહાનિરીક્ષક ચિરાગ કોરડીયા અને પૂર્વ કચ્છના પોલીસ અધિક્ષક સાગર બાગમારના માર્ગદર્શન હેઠળ જિલ્લામાં Say No To Drugs અભિયાનને વધુ અસરકારક બનાવવા સતત કાર્યવાહી ચાલી રહી છે. આ અભિયાન હેઠળ નશીલા પદાર્થોના વેચાણ, ખરીદી અને હેરાફેરીમાં સંડોવાયેલા તત્વો સામે કડક કાનૂની પગલાં લેવામાં આવી રહ્યા છે.

આ જ અભિયાન અંતર્ગત અંજાર વિભાગના નાયબ પોલીસ અધિક્ષક મુકેશ ચૌધરીના માર્ગદર્શન હેઠળ ગાંધીધામ એ-ડિવિઝન પોલીસ સ્ટેશનના પોલીસ ઇન્સ્પેક્ટર એમ.જે. રાઠોડે સર્વેલન્સ સ્ટાફને સઘન પેટ્રોલિંગ અને ગુપ્ત માહિતીના આધારે કાર્યવાહી કરવા સૂચના આપી હતી. દરમિયાન મળેલી ચોક્કસ બાતમીના આધારે ઓમ સિનેપ્લેક્સ ફન બ્લાસ્ટ સામે આવેલા ખુલ્લા પ્લોટમાં પંચોની હાજરીમાં રેડ કરવામાં આવી હતી.

દરોડા દરમિયાન પોલીસે દિલીપ ઉર્ફે દીપડ સોહનલાલ ચૌહાણ (ઉંમર ૩૩ વર્ષ), રહે. ૮૦૦ વાળી લાઈન, સેક્ટર-૧૪, ગાંધીધામને ઝડપી પાડ્યો હતો. તેની પાસેથી મળેલા શંકાસ્પદ પદાર્થનું એફ.એસ.એલ. અધિકારી દ્વારા પરીક્ષણ કરાવવામાં આવતા તે હેરોઈન હોવાનું બહાર આવ્યું હતું. કબ્જે કરાયેલા હેરોઈનનું કુલ વજન ૧.૯૪૦ ગ્રામ હોવાનું નોંધાયું હતું.

પોલીસ તપાસ દરમિયાન આ નશીલા પદાર્થના પુરવઠા સાથે જોડાયેલા રાકેશ, રહે. જોધપુર (રાજસ્થાન), મોબાઈલ નંબર ૮૬૧૯૫૦૩૯૩૭, નામના વ્યક્તિની સંડોવણી સામે આવી છે. હાલ તે ફરાર હોવાથી તેને વોન્ટેડ જાહેર કરી પોલીસે તેની શોધખોળ તેજ બનાવી છે.

આ કેસમાં પોલીસે કુલ રૂ. ૯૩,૮૦૦નો મુદ્દામાલ કબ્જે કર્યો છે, જેમાં રૂ. ૩૮,૮૦૦ કિંમતનું ૧.૯૪૦ ગ્રામ હેરોઈન, બે મોબાઈલ ફોન (રૂ. ૨૦,૦૦૦) તથા હીરો કંપનીનું મોટરસાયકલ નંબર GJ-12-DF-4231 (રૂ. ૩૫,૦૦૦)નો સમાવેશ થાય છે.

આ સમગ્ર મામલે ગાંધીધામ એ-ડિવિઝન પોલીસ સ્ટેશનમાં ભાગ-બી ગુનો ક્રમાંક ૧૧૯૯૩૦૦૬૨૬૦૭૮૫/૨૦૨૬ હેઠળ એન.ડી.પી.એસ. એક્ટની કલમ ૮(સી), ૨૧(એ) અને ૨૯ મુજબ ગુનો નોંધી વધુ તપાસ હાથ ધરવામાં આવી છે.

આરોપીઓનો ગુનાહિત ઇતિહાસ: પોલીસ દ્વારા જાહેર કરવામાં આવેલી વિગતોમાં ધરપકડ કરાયેલા આરોપી દિલીપ ઉર્ફે દીપડ સોહનલાલ ચૌહાણ તથા ફરાર આરોપી રાકેશ સામે અગાઉના કોઈ ગુનાહિત ઇતિહાસનો ઉલ્લેખ કરવામાં આવ્યો નથી. જો તપાસ દરમિયાન અગાઉના ગુનાઓ અંગે માહિતી સામે આવશે તો તે આધારે પણ કાયદેસરની કાર્યવાહી કરવામાં આવશે.

હિન્દુસ્થાન સમાચાર / Rohit Ramjibhai Padhiyar