- 233 ગ્રામના 24 કેરેટ સોનાના બે 'ટીટી બાર' જપ્ત કરાયા

અમદાવાદ,16 જુલાઇ (હિ.સ.) અમદાવાદ આંતરરાષ્ટ્રીય એરપોર્ટ પર હમણાંથી સોનાની દાણચોરીનું પ્રમાણ વધ્યું છે. અમદાવાદ કસ્ટમ્સના 'એર ઇન્ટેલિજન્સ યુનિટ'ના અધિકારીઓએ, અમદાવાદ આંતરરાષ્ટ્રીય એરપોર્ટ પર અબુ-ધાબીથી ફ્લાઇટ નંબર 3L111 દ્વારા આજે અમદાવાદ આગમન કરનાર એક મહિલા મુસાફરને અટકાવી હતી.

તપાસ દરમિયાન જાણવા મળ્યું હતું કે, આ મુસાફરે કસ્ટમ ડ્યુટી ચૂકવવાનું ટાળવાના ઈરાદાથી પોતાના બુરખાની અંદર 24 કેરેટ સોનાના બે 'ટીટી બાર' છુપાવ્યા હતા, જેનું કુલ વજન 233 ગ્રામ હતું.જેની બજાર કિંમત 34,29,216 રૂપિયા થાય છે. આ સોનું કસ્ટમ્સ વિભાગ દ્વારા, ‘કસ્ટમ્સ એક્ટ, 1962’ની જોગવાઈઓ હેઠળ જપ્ત કરવામાં આવ્યું છે. આ સોનું કયાંથી અને કોની પાસેથી તેમજ કોને આપવાના હતા તે દિશામાં તપાસ હાથ ધરી છે.

અબુધાબીથી ફલાઇટમાં આવેલાં મુસાફર પાસેથી 34 લાખથી વધુ કિંમતના 24 કેરેટ સોનાના બાર, કે જેનું વજન 233 ગ્રામનો જથ્થો પકડી પાડયો છે.

અમદાવાદ કસ્ટમ્સ તરફથી પેસેન્જર પ્રોફાઇલિંગ બનાવવામાં આવે છે. આ પ્રોફાઇલિંગમાં, મુસાફર કયારે કયારે અને કેટલી વાર ફલાઇટમાં પ્રવાસ કર્યો તેની વિગતો તૈયાર કરી છે. વારંવાર અવરજવર કરનારાની પ્રોફાઇલીંગના આધારે તપાસ કરવામાં આવે છે.

હિન્દુસ્થાન સમાચાર / હર્ષ શાહ