ભાવનગર, 17 જુલાઈ (હિ.સ.) ભાવનગર જિલ્લાના મહુવા તાલુકાના લાઈટ હાઉસ બંદર રોડ પર બે મોટરસાયકલ વચ્ચે સર્જાયેલા ગંભીર માર્ગ અકસ્માતમાં એક યુવકનું કરુણ મોત નીપજ્યું છે, જ્યારે અન્ય ત્રણ વ્યક્તિઓ ઇજાગ્રસ્ત થતા તેમને સારવાર માટે હોસ્પિટલમાં ખસેડવામાં આવ્યા છે. અકસ્માતના સમાચારથી સમગ્ર વિસ્તારમાં શોકની લાગણી વ્યાપી ગઈ છે.

પ્રાપ્ત વિગતો મુજબ, લાઈટ હાઉસ બંદર રોડ પર સામસામે આવી રહેલી બે મોટરસાયકલો વચ્ચે જોરદાર ટક્કર થતાં ચારેય સવારીઓ રોડ પર ફંગોળાઈ ગઈ હતી. અકસ્માત એટલો ગંભીર હતો કે હિતેષ શિયાળને માથા સહિત શરીરના ભાગોમાં ગંભીર ઇજાઓ પહોંચી હતી. સ્થાનિક લોકો તાત્કાલિક ઘટનાસ્થળે દોડી આવ્યા હતા અને 108 એમ્બ્યુલન્સની મદદથી તમામ ઇજાગ્રસ્તોને સારવાર માટે નજીકની હોસ્પિટલમાં ખસેડવામાં આવ્યા હતા.

હોસ્પિટલ ખાતે ફરજ પરના તબીબોએ હિતેષ શિયાળને તપાસ્યા બાદ મૃત જાહેર કર્યા હતા. જ્યારે અન્ય ત્રણ ઇજાગ્રસ્તોની સારવાર ચાલી રહી છે. તેમની હાલત અંગે તબીબો સતત નજર રાખી રહ્યા છે.

અકસ્માતની જાણ થતાં મહુવા પોલીસનો કાફલો પણ ઘટનાસ્થળે પહોંચ્યો હતો. પોલીસે સ્થળનું નિરીક્ષણ કરી અકસ્માત અંગેની માહિતી એકત્રિત કરી હતી તેમજ બંને વાહનો કબજે લઈને આગળની કાયદેસરની કાર્યવાહી હાથ ધરી છે. અકસ્માતનું ચોક્કસ કારણ જાણવા પોલીસે તપાસ શરૂ કરી છે.

આ દુર્ઘટનાએ ફરી એકવાર માર્ગ સલામતી અને વાહન ચલાવતી વખતે સાવચેતી રાખવાની જરૂરિયાત ઉજાગર કરી છે. મૃતક હિતેષ શિયાળના પરિવારજનોમાં શોકનું મોજું ફરી વળ્યું છે.

હિન્દુસ્થાન સમાચાર / DISHANT NANDRAMBHAI GONADLIYA