કચ્છ, 18 જુલાઈ (હિ.સ.) : પશ્ચિમ કચ્છ લોકલ ક્રાઇમ બ્રાન્ચ (LCB)એ જિલ્લામાં ગેરકાયદે જુગારની પ્રવૃત્તિઓ સામે વધુ એક અસરકારક કાર્યવાહી હાથ ધરી છે. માંડવી તાલુકાના કોટાયા ગામ નજીક ધાણીપાસા વડે રમાતો જુગાર ઝડપીને પોલીસે ત્રણ શખ્સોને રંગેહાથ ઝડપી પાડ્યા છે, જ્યારે પાંચ અન્ય આરોપીઓ સ્થળ પરથી ફરાર થઈ જવામાં સફળ રહ્યા હતા. સમગ્ર કાર્યવાહી દરમિયાન પોલીસે રોકડ રકમ, મોબાઇલ ફોન, મોટરસાયકલો તેમજ જુગારમાં ઉપયોગમાં લેવાતા ધાણીપાસા સહિતનો મુદ્દામાલ કબજે કરીને વધુ તપાસ શરૂ કરી છે.

પોલીસને મળેલી ચોક્કસ બાતમીના આધારે લોકલ ક્રાઇમ બ્રાન્ચની ટીમે આયોજનબદ્ધ રીતે દરોડો પાડ્યો હતો. સ્થળ પર પહોંચતા જ કેટલાક શખ્સો ભાગવાનો પ્રયાસ કર્યો હતો, પરંતુ પોલીસે કરશન ભીમશી ગઢવી, ભાવેશ નારાણભાઈ ગઢવી અને વસીમ અદ્રેમાન ચાકીને ઝડપી પાડવામાં સફળતા મેળવી હતી. પોલીસના જણાવ્યા મુજબ કરશન ભીમશી ગઢવી અગાઉથી લિસ્ટેડ જુગારી તરીકે નોંધાયેલ હોવાનું પણ સામે આવ્યું છે.

દરોડા દરમિયાન પોલીસે કુલ રૂ. 42 હજારની રોકડ રકમ, એક મોબાઇલ ફોન, બે મોટરસાયકલ તેમજ ધાણીપાસાના બે નંગ કબજે કર્યા હતા. બીજી તરફ સતાર હિંગોરજા, અનવર ઉર્ફે અનુ કુંભાર, ચંદુ રતન ગઢવી, કરણસિંહ અને ફકીર દરાડ પોલીસને ચકમો આપી સ્થળ પરથી નાસી છૂટ્યા હતા. ફરાર થયેલા આરોપીઓને ઝડપી પાડવા માટે પોલીસે શોધખોળ તેજ કરી છે.

આ સમગ્ર ઓપરેશન પશ્ચિમ કચ્છ લોકલ ક્રાઇમ બ્રાન્ચના એએસઆઈ દેવજીભાઈ મહેશ્વરીના માર્ગદર્શન હેઠળ હાથ ધરાયું હતું. તેમની સાથે સુરજભાઈ વેગડા, હેડ કોન્સ્ટેબલ મૂળરાજભાઈ ગઢવી, લીલાભાઈ દેસાઈ અને રાજેશભાઈ ગઢવીએ મહત્વપૂર્ણ ભૂમિકા ભજવી હતી. ટીમની ઝડપી અને સુનિયોજિત કાર્યવાહીના પરિણામે ગેરકાયદે જુગારના અડ્ડા પર સફળ દરોડો પાડવામાં આવ્યો હતો.

પોલીસે પકડાયેલા આરોપીઓ સામે જુગારધારા હેઠળ ગુનો નોંધી કાયદેસરની કાર્યવાહી હાથ ધરી છે. સાથે જ ફરાર આરોપીઓની ધરપકડ માટે વિવિધ દિશામાં તપાસ આગળ વધારવામાં આવી રહી છે. પશ્ચિમ કચ્છ પોલીસ દ્વારા ગેરકાયદે પ્રવૃત્તિઓ સામે ચલાવવામાં આવી રહેલા અભિયાન અંતર્ગત આવી કાર્યવાહી આગામી દિવસોમાં પણ યથાવત્ રહેશે તેવો સંદેશ આ ઓપરેશનથી સ્પષ્ટ થયો છે.

---------------

હિન્દુસ્થાન સમાચાર / Rohit Ramjibhai Padhiyar