અમરેલી,, 18 જુલાઈ (હિ.સ.)
લાઠી તાલુકાના શેખ પીપરીયા ગામમાં શિક્ષણ ક્ષેત્રે વધુ એક મહત્વપૂર્ણ વિકાસકાર્યનો પ્રારંભ થયો છે. ગામમાં અંદાજે ₹1.90 કરોડના ખર્ચે નિર્માણ પામનારી નવી માધ્યમિક શાળાના ભવનનું ખાતમુહૂર્ત ધારાસભ્ય જનક તળાવિયાના હસ્તે કરવામાં આવ્યું હતું. આ પ્રસંગે ગ્રામજનો, આગેવાનો, શિક્ષણ વિભાગના અધિકારીઓ તથા સ્થાનિક જનપ્રતિનિધિઓ મોટી સંખ્યામાં ઉપસ્થિત રહ્યા હતા.
ધારાસભ્ય જનક તળાવિયાએ જણાવ્યું હતું કે ગ્રામ્ય વિસ્તારોમાં ગુણવત્તાયુક્ત શિક્ષણની સુવિધા ઉપલબ્ધ કરાવવી રાજ્ય સરકારની પ્રાથમિકતા છે. નવી શાળાનું નિર્માણ પૂર્ણ થયા બાદ વિદ્યાર્થીઓને આધુનિક અને સુવિધાસભર શૈક્ષણિક માહોલ મળશે, જેના કારણે ગામ અને આસપાસના વિસ્તારના વિદ્યાર્થીઓને નોંધપાત્ર લાભ થશે.
કાર્યક્રમ દરમિયાન મહાનુભાવોએ શિક્ષણના મહત્વ પર ભાર મૂકતાં વિદ્યાર્થીઓને ઉચ્ચ શિક્ષણ માટે પ્રેરિત કર્યા હતા. ગ્રામજનોએ પણ ગામને નવી શાળાની ભેટ મળતા આનંદ વ્યક્ત કરી રાજ્ય સરકાર અને ધારાસભ્યનો આભાર માન્યો હતો.
નવી માધ્યમિક શાળાનું નિર્માણ પૂર્ણ થયા બાદ શેખ પીપરીયા સહિત આસપાસના ગામોના વિદ્યાર્થીઓને વધુ સારી શૈક્ષણિક સુવિધાઓ ઉપલબ્ધ થશે અને ગ્રામ્ય વિસ્તારમાં શિક્ષણના વિકાસને નવી દિશા મળશે.
---------------
હિન્દુસ્થાન સમાચાર / Gondaliya Abhishek Nandrambhai
