ભાવનગર,18 જુલાઈ (હિ.સ.) ભાવનગર જિલ્લાના તળાજા તાલુકાના નવા સાંગાણા ગામ સહિત આસપાસના વિસ્તારોમાં આજે ધીમીધારે વરસાદ શરૂ થતાં વાતાવરણમાં ઠંડક પ્રસરી ગઈ છે. છેલ્લા કેટલાક દિવસોથી વરસાદની રાહ જોઈ રહેલા ગ્રામજનો અને ખેડૂતો માટે આ વરસાદ રાહતરૂપ બન્યો છે. વરસાદ શરૂ થતાં ખેતરોમાં ફરી હરિયાળી છવાવાની આશા જાગી છે અને ખરીફ પાકને પણ લાભ મળશે તેવી ખેડૂતોમાં આશા વ્યક્ત થઈ રહી છે.

નવા સાંગાણા ગામમાં સવારથી જ વાદળછાયું વાતાવરણ જોવા મળ્યું હતું અને બાદમાં ધીમી ગતિએ વરસાદ વરસવાનું શરૂ થયું હતું. વરસાદને કારણે રસ્તાઓ ભીના બન્યા હતા અને ગરમી તથા ઉકળાટમાંથી લોકોને રાહત મળી હતી. ગ્રામ્ય વિસ્તારમાં વરસાદી માહોલને કારણે બાળકો અને યુવાનોમાં પણ આનંદનો માહોલ જોવા મળ્યો હતો.

ખેડૂતોના જણાવ્યા મુજબ હાલનો વરસાદ કપાસ, મગફળી, તલ સહિતના ખરીફ પાક માટે લાભદાયી સાબિત થશે. જો આગામી દિવસોમાં પણ સારો વરસાદ ચાલુ રહેશે તો પાકના વિકાસને વેગ મળશે અને ઉત્પાદન સારું રહેવાની આશા છે. બીજી તરફ પશુપાલકોને પણ ચારા માટે અનુકૂળ પરિસ્થિતિ સર્જાશે.

હવામાનમાં આવેલા આ બદલાવને કારણે સમગ્ર વિસ્તારમાં ખુશીનો માહોલ જોવા મળી રહ્યો છે. ગ્રામજનોએ પણ આગામી દિવસોમાં સારો વરસાદ વરસે તેવી પ્રાર્થના વ્યક્ત કરી છે. હાલ ધીમીધારે વરસી રહેલો વરસાદ ખેડૂતો માટે આશાનું કિરણ બની રહ્યો છે અને ખેતી માટે અનુકૂળ વાતાવરણ સર્જી રહ્યો છે.

હિન્દુસ્થાન સમાચાર / DISHANT NANDRAMBHAI GONADLIYA