કચ્છ, 19 જુલાઈ (હિ.સ.) : પશ્ચિમ કચ્છમાં મિલકત સંબંધિત ગુનાઓ પર નિયંત્રણ લાવવા અને શંકાસ્પદ વાહનો સામે કડક કાર્યવાહી કરવા લોકલ ક્રાઇમ બ્રાન્ચ (એલસીબી) દ્વારા સતત દેખરેખ રાખવામાં આવી રહી છે. આ અભિયાન અંતર્ગત એલસીબીની ટીમે પધ્ધર પોલીસ સ્ટેશન વિસ્તારમાંથી આધાર-પુરાવા વગરના મોટરસાઇકલ સાથે ફરી રહેલા એક શખ્સને ઝડપી પાડી વધુ તપાસ હાથ ધરી છે.

પ્રાપ્ત વિગતો અનુસાર, એલસીબી પશ્ચિમ કચ્છ-ભુજની ટીમ પેટ્રોલિંગ અને બાતમીના આધારે વિસ્તારમાં સઘન ચેકિંગ કરી રહી હતી. તે દરમિયાન એક વ્યક્તિ શંકાસ્પદ હાલતમાં મોટરસાઇકલ સાથે જોવા મળ્યો હતો. પોલીસે તેને અટકાવી વાહન અંગે જરૂરી દસ્તાવેજો તેમજ માલિકી સંબંધિત પુરાવા રજૂ કરવા જણાવ્યું હતું. જોકે સંબંધિત વ્યક્તિ કોઈપણ પ્રકારના આધારભૂત દસ્તાવેજો રજૂ કરવામાં નિષ્ફળ ગયો હતો.

પોલીસે પ્રાથમિક પૂછપરછ દરમિયાન વાહનની માલિકી અંગે સંતોષકારક જવાબ ન મળતા મોટરસાઇકલ કબજે લઈ શખ્સને કાયદેસરની કાર્યવાહી માટે અટકાયત કરી હતી. પકડાયેલા વ્યક્તિની ઓળખ જાફરશા હાજીસુમારશમા શેખ, રહે. નવા કનૈયાબે, તાલુકો ભુજ તરીકે થઈ છે.

પોલીસ હવે મોટરસાઇકલની વાસ્તવિક માલિકી, વાહન ક્યાંથી અને કેવી રીતે મેળવવામાં આવ્યું તેમજ તે કોઈ ગુનામાં ઉપયોગમાં લેવામાં આવ્યું છે કે કેમ તે સહિતના તમામ પાસાઓની ઊંડાણપૂર્વક તપાસ કરી રહી છે. સાથે જ વાહનના એન્જિન અને ચેસિસ નંબરના આધારે વિવિધ પોલીસ રેકોર્ડ તથા ડેટાબેઝમાં પણ ચકાસણી કરવામાં આવી રહી હોવાનું જાણવા મળે છે.

આ સમગ્ર કામગીરી લોકલ ક્રાઇમ બ્રાન્ચના હેડ કોન્સ્ટેબલ રણજીતસિંહ જાડેજા અને હેડ કોન્સ્ટેબલ જયદેવસિંહ જાડેજાએ સફળતાપૂર્વક પાર પાડી હતી. તેમની સતર્કતા અને ઝડપી કાર્યવાહીથી શંકાસ્પદ વાહન પોલીસના કબજામાં આવ્યું છે, જેના કારણે સંભવિત ગુનાઓના ભેદ ઉકેલવામાં પણ મદદ મળી શકે છે.

પશ્ચિમ કચ્છ પોલીસ દ્વારા ગેરકાયદેસર પ્રવૃત્તિઓ, ચોરીના વાહનો અને શંકાસ્પદ હિલચાલ સામે સતત સઘન અભિયાન ચલાવવામાં આવી રહ્યું છે. પોલીસનું માનવું છે કે આવા ચેકિંગ અભિયાનથી ગુનાખોરી પર અસરકારક અંકુશ લાવી શકાય છે અને કાયદો-વ્યવસ્થા વધુ મજબૂત બની શકે છે. હાલ સમગ્ર મામલે વધુ તપાસ પધ્ધર પોલીસ અને એલસીબી દ્વારા આગળ ધપાવવામાં આવી રહી છે.

---------------

હિન્દુસ્થાન સમાચાર / Rohit Ramjibhai Padhiyar