અમરેલી, 19 જુલાઈ (હિ.સ.) : અમરેલી જિલ્લાના માળીલા ખાતે નવા નીરના વધામણાંનો પાવન અવસર ભક્તિભાવ અને ઉત્સાહભેર ઉજવવામાં આવ્યો હતો. આ પ્રસંગે રાજ્યમંત્રી કૌશિક વેકરિયાએ હાજરી આપી નવા નીરનું વધામણું કર્યું હતું. સ્થાનિક આગેવાનો, ગ્રામજનો અને મોટી સંખ્યામાં લોકોની ઉપસ્થિતિમાં યોજાયેલા કાર્યક્રમમાં પ્રકૃતિ પ્રત્યે આદર અને જળસંચયનું મહત્વ ઉજાગર કરવામાં આવ્યું.

કાર્યક્રમ દરમિયાન રાજ્યમંત્રી કૌશિક વેકરિયાએ નવા નીરને વધાવી સારા વરસાદ, ભરપૂર જળસંચય, સમૃદ્ધ ખેતી અને સમગ્ર વિસ્તારના સુખ-સમૃદ્ધિ માટે પ્રાર્થના કરી હતી. તેમણે જણાવ્યું કે પાણી એ જીવનનું આધારસ્તંભ છે અને વરસાદનું દરેક ટીપું ખેડૂતો માટે આશા, વિકાસ અને હરિયાળીની નવી કિરણ લઈને આવે છે. જળસંચય અને પાણીના સંરક્ષણ માટે સમાજના દરેક વ્યક્તિએ જવાબદારીપૂર્વક યોગદાન આપવું જોઈએ તેવી અપીલ પણ તેમણે કરી હતી.

આ પ્રસંગે તેમણે ગ્રામજનો સાથે મુલાકાત કરી તેમની સુખાકારી અંગે માહિતી મેળવી તેમજ વિસ્તારમાં વરસાદ અને કૃષિની સ્થિતિ અંગે ચર્ચા કરી હતી. સ્થાનિક લોકોએ પણ નવા નીરના આગમનને શુભ સંકેત ગણાવી પ્રકૃતિ પ્રત્યે આભાર વ્યક્ત કર્યો હતો.

રાજ્યમંત્રી કૌશિકભાઈ વેકરિયાએ જણાવ્યું કે સારો વરસાદ માત્ર ખેતી માટે જ નહીં, પરંતુ પીવાના પાણી, પશુપાલન અને સમગ્ર ગ્રામ્ય અર્થતંત્ર માટે પણ અત્યંત મહત્વનો છે. સરકાર દ્વારા જળસંચય અને પાણીના સદુપયોગ માટે વિવિધ યોજનાઓ અમલમાં મૂકવામાં આવી રહી છે, જેમાં જનભાગીદારી પણ એટલી જ જરૂરી છે.

પ્રાર્થના અને શુભેચ્છાઓ સાથે યોજાયેલા આ કાર્યક્રમમાં સૌએ એવી કામના વ્યક્ત કરી કે વરસાદનું દરેક ટીપું સમગ્ર વિસ્તારમાં હરિયાળી, સમૃદ્ધિ અને વિકાસનું પ્રતીક બને તેમજ ખેડૂતોના ખેતરો લીલાછમ રહે અને દરેક પરિવારમાં સુખ-સમૃદ્ધિનો વાસ થાય. સમગ્ર કાર્યક્રમ ધાર્મિક આસ્થા, પ્રકૃતિ પ્રત્યેના આદર અને લોકભાગીદારીના માહોલ વચ્ચે સંપન્ન થયો.

---------------

હિન્દુસ્થાન સમાચાર / Gondaliya Abhishek Nandrambhai