કચ્છ, 20 જુલાઈ (હિ.સ.) ભુજ શહેરમાં થોડા સમય અગાઉ વોંકળા ફળિયામાં આવેલા પાન મસાલાના ગોડાઉનમાં થયેલી ચોરીના બનાવનો સફળ ભેદ ઉકેલવામાં પશ્ચિમ કચ્છ લોકલ ક્રાઈમ બ્રાન્ચને મહત્વપૂર્ણ સફળતા મળી છે. પોલીસે ઝડપી તપાસ અને ચોકસાઈભરી કામગીરીના આધારે ચોરીમાં સંડોવાયેલા આરોપીને ઝડપી પાડી તેની પાસેથી લાખો રૂપિયાનો મુદ્દામાલ પણ કબ્જે કર્યો છે. આ કામગીરી બાદ વેપારીઓમાં રાહતની લાગણી ફેલાઈ છે, જ્યારે ગુનાખોરી સામે પોલીસની સક્રિય કામગીરીની પણ ચર્ચા થઈ રહી છે.

પોલીસ તપાસ દરમિયાન મળેલા પુરાવા, બાતમી અને ટેકનિકલ માહિતીના આધારે ભુજના ભાવસાર એપાર્ટમેન્ટમાં ત્રીજા માળે રહેતા તેમજ મૂળ સરવા મંડપ પાસે શક્તિ હોટેલ પાછળ રહેતા રામજી વિશ્રામ વાઘેલાને શંકાના આધારે ઝડપી લેવામાં આવ્યો હતો. પૂછપરછ દરમિયાન આરોપી પાસેથી ચોરી અંગે મહત્વપૂર્ણ માહિતી મળી આવતાં પોલીસે વધુ તપાસ હાથ ધરી હતી.

તપાસ દરમિયાન આરોપીના કબજામાંથી ચોરીમાં ગયેલો રાજ નિવાસ પાન મસાલાના જથ્થા સાથે મયુર બીડીના કટ્ટા તેમજ એક મોબાઇલ ફોન મળી આવ્યો હતો. પોલીસે કુલ રૂ. 2,01,326 કિંમતનો મુદ્દામાલ કબ્જે કરીને કાયદેસરની કાર્યવાહી હાથ ધરી છે. ચોરીમાં ગયેલો મોટાભાગનો માલસામાન પરત મળી આવતાં સંબંધિત વેપારીને પણ નોંધપાત્ર રાહત મળી હોવાનું જાણવા મળે છે.

આ સમગ્ર મામલે ભુજ શહેરના એ-ડિવિઝન પોલીસ સ્ટેશનમાં નોંધાયેલા ગુના અંતર્ગત ભારતીય ન્યાય સંહિતાની કલમ 305(એ), 331(3) અને 331(4) મુજબ ગુનો દાખલ કરવામાં આવ્યો છે. આરોપીની વધુ પૂછપરછ કરીને અન્ય કોઈ ગુનામાં સંડોવણી છે કે નહીં તેમજ ચોરીનો માલ અન્યત્ર વેચવાનો પ્રયાસ થયો હતો કે કેમ તે દિશામાં પણ તપાસ આગળ વધારવામાં આવી રહી છે.

આ સફળ કામગીરી પશ્ચિમ કચ્છ લોકલ ક્રાઈમ બ્રાન્ચના એએસઆઈ સુનીલ પરમાર, હેડ કોન્સ્ટેબલ રણજીતસિંહ જાડેજા અને હેડ કોન્સ્ટેબલ જયદેવસિંહ જાડેજાએ સંયુક્ત રીતે પાર પાડી હતી. પોલીસની ઝડપી અને અસરકારક કાર્યવાહીથી ચોરીના ગુનાનો ટૂંકા સમયમાં ભેદ ઉકેલાતા વેપારી વર્ગમાં વિશ્વાસ વધ્યો છે અને ગુનાખોર તત્વોને પણ કડક સંદેશો મળ્યો છે.

હિન્દુસ્થાન સમાચાર / Rohit Ramjibhai Padhiyar