ઉજ્જૈન, નવી દિલ્હી, 21 ઓગસ્ટ (હિ.સ.) ફિલ્મ અભિનેતા મનોજ જોશીએ, શુક્રવારે વહેલી સવારે મધ્યપ્રદેશના ઉજ્જૈન જિલ્લાના શ્રી મહાકાલેશ્વર જ્યોતિર્લિંગ પહોંચીને પ્રાતઃકાલીન ભસ્મ આરતીમાં ભાગ લીધો. તેમણે બાબા મહાકાલના દર્શન કર્યા. લગભગ અઢી કલાક સુધી મંદિરમાં રહીને રુદ્રપાઠ સાંભળ્યા અને ભસ્મ આરતીના દિવ્ય વાતાવરણનો હિસ્સો બન્યા પછી, તેમણે પોતાના અનુભવો શેર કરતા કહ્યું કે ભગવાન મહાકાલની શક્તિ અને અનુભૂતિને શબ્દોમાં વ્યક્ત કરવી શક્ય નથી.

જોશીએ વિશ્વ પ્રસિદ્ધ શ્રી મહાકાલેશ્વર મંદિરમાં શુક્રવારે વહેલી સવારે બાબા મહાકાલના દર્શન કર્યા અને ભસ્મ આરતીમાં સામેલ થયા. તેઓ રાત્રે લગભગ 3 વાગ્યે જ મંદિર પરિસરમાં પહોંચી ગયા હતા અને સવારે 5:30 વાગ્યા સુધી ત્યાં હાજર રહ્યા.

ભસ્મ આરતીના સમાપન પર મનોજ જોશીએ ભગવાન મહાકાલના ચરણોમાં શીશ નમાવીને દેશ અને સમાજના કલ્યાણની મંગલ કામના કરી. અભિનેતાના મંદિર આગમન પર શ્રી મહાકાલેશ્વર મંદિર પ્રબંધ સમિતિ વતી સહાયક પ્રશાસક આશિષ ફલવાડિયાએ તેમનું ઔપચારિક સ્વાગત કર્યું. ભસ્મ આરતી સંપન્ન થયા પછી, મંદિર સમિતિ દ્વારા મનોજ જોશીને ભગવાન મહાકાલનો પ્રસાદ અને સ્મૃતિચિહ્ન ભેટ આપીને સન્માનિત કરવામાં આવ્યા.

રજત મુકુટ-ત્રિશૂળથી સજ્જ બાબા મહાકાલ

ભસ્મ આરતી દરમિયાન બાબા મહાકાલનું વિધિ-વિધાનથી પૂજન અને આકર્ષક શૃંગાર કરવામાં આવ્યો. ગર્ભગૃહના દ્વાર ખુલ્યા પછી ભગવાનનો પંચામૃત અભિષેક કરવામાં આવ્યો. આ પછી, રજત ચંદ્ર, ત્રિશૂળ, મુકુટ અને વિવિધ આભૂષણોથી બાબા મહાકાલને સજાવવામાં આવ્યા.

સૌથી પહેલા સભામંડપમાં વીરભદ્રજીના કાનમાં સ્વસ્તિ વાચન કરવામાં આવ્યું. આ પછી, ઘંટડી વગાડીને ભગવાન પાસેથી આજ્ઞા લેવામાં આવી અને સભામંડપના ચાંદીના દ્વાર ખોલવામાં આવ્યા. ગર્ભગૃહના દ્વાર ખુલતા જ પુજારીઓએ બાબા મહાકાલનો પાછલો શૃંગાર ઉતાર્યો અને પંચામૃત પૂજન પછી કપૂર આરતી કરી. આ પછી, નંદી હોલમાં નંદીજીનું સ્નાન, ધ્યાન અને પૂજન કરવામાં આવ્યું. ભગવાન મહાકાલનો જળથી અભિષેક કર્યા પછી, દૂધ, દહીં, ઘી, સાકર, મધ અને ફળોના રસથી બનેલા પંચામૃતથી પૂજન કરવામાં આવ્યું.

પંચામૃત પૂજન પછી બાબા મહાકાલનો વિશેષ શૃંગાર કરવામાં આવ્યો. ભગવાનને ભસ્મ, ભાંગ, ચંદન અને ડ્રાયફ્રુટ અર્પણ કરવામાં આવ્યા. આ સાથે જ રજત ચંદ્ર, ત્રિશૂળ અને મુકુટ ધારણ કરાવવામાં આવ્યા. બાબા મહાકાલને શેષનાગનો રજત મુકુટ, રજત મુંડમાળ અને રુદ્રાક્ષની માળા પહેરાવવામાં આવી. સુગંધિત ફૂલોથી બનેલી માળાથી પણ ભગવાનનો શૃંગાર કરવામાં આવ્યો. આ પછી, ફળ અને મિષ્ટાનનો ભોગ ધરાવવામાં આવ્યો. ભસ્મ આરતી દરમિયાન મોટી સંખ્યામાં શ્રદ્ધાળુઓ મંદિર પહોંચ્યા. ભક્તોએ બાબા મહાકાલના દર્શન કરીને આશીર્વાદ લીધા. આરતી દરમિયાન આખું મંદિર પરિસર ‘જય શ્રી મહાકાલ’ના જયઘોષથી ગુંજી ઉઠ્યું.

હિન્દુસ્થાન સમાચાર / ઉમેદ સિંહ રાવત / મુકુંદ

હિન્દુસ્થાન સમાચાર / ડો.હિતેશ એન.વ્યાસ