નવી દિલ્હી, 22 ઓગસ્ટ (હિ.સ.). દિલ્હી સ્થિત કોન્સ્ટિટ્યુશન ક્લબ ઓફ ઇન્ડિયામાં શનિવારે સાહિત્યિક અને સાંસ્કૃતિક સમારોહ દરમિયાન બે પુસ્તકોનું લોકાર્પણ કરવામાં આવ્યું.

આ બે મહત્વપૂર્ણ પુસ્તકોમાં ડિફેન્ડર્સ ઓફ અખંડ ભારત (લેખક-ડો. અશોક ઉપાધ્યાય અને ડો. શોભા ઉપાધ્યાય) અને સોલહ સંસ્કાર ઓફ સનાતન ધર્મ (લેખક-ડો. શોભા ઉપાધ્યાય) નો સમાવેશ થાય છે. આ પુસ્તકોનો મુખ્ય ઉદ્દેશ્ય યુવા પેઢીને ભારતની સભ્યતાગત વિરાસતને સમજવા, તેનું સન્માન કરવા અને તેને આગળ વધારવાની પ્રેરણા આપવાનો છે.

પોતાના સંયુક્ત સંબોધનમાં લેખકોએ આ વાત પર ભાર મૂક્યો કે, ભારતની મહાનતા ફક્ત તેની સૈન્ય શક્તિમાં જ નહીં, તેના સાંસ્કૃતિક મૂલ્યો અને સભ્યતાગત નિરંતરતામાં પણ રહેલી છે.

આ પુસ્તકોના સંદેશને આજના સમયમાં અત્યંત પ્રાસંગિક ગણાવતા મુખ્ય વક્તાઓએ કહ્યું, શસ્ત્રો રાષ્ટ્રની સીમાઓની રક્ષા કરે છે જ્યારે સંસ્કાર તેની આત્માની રક્ષા કરે છે.

આ પુસ્તકોમાં એ પણ વિશ્લેષણ કરવામાં આવ્યું છે કે, રાજકીય ઉથલપાથલ અને અનેક ઐતિહાસિક પરિવર્તનો છતાં ભારતીય સભ્યતા 5,000 વર્ષોથી વધુ સમયથી કેવી રીતે અને શા માટે નિરંતર બની રહી છે.

આ સમારોહની અધ્યક્ષતા ઇન્દિરા ગાંધી રાષ્ટ્રીય કલા કેન્દ્ર (આઇજીએનસીએ) ના અધ્યક્ષ 'પદ્મ ભૂષણ' રામ બહાદુર રાયે કરી. આ દરમિયાન મુખ્ય અતિથિ તરીકે કેન્દ્રીય કાપડ મંત્રી ગિરિરાજ સિંહ, મુખ્ય વક્તા રાજ્યસભાના સભ્ય અને ભારતીય જનતા પાર્ટી (ભાજપ) ના રાષ્ટ્રીય પ્રવક્તા ડો. સુધાંશુ ત્રિવેદી, કુશાભાઉ ઠાકરે વિશ્વવિદ્યાલયના કુલપતિ પ્રો. બલદેવ ભાઈ શર્મા, ભાજપના વરિષ્ઠ નેતા અને પૂર્વ રાષ્ટ્રીય ઉપાધ્યક્ષ શ્યામ જાજુ જી અને પ્રભાત પ્રકાશનના પ્રબંધ નિર્દેશક પ્રભાત કુમાર ઉપસ્થિત રહ્યા.

હિન્દુસ્થાન સમાચાર / શ્રદ્ધા દ્વિવેદી /અનુપ શર્મા

હિન્દુસ્થાન સમાચાર / ડો.હિતેશ એન.વ્યાસ