રામગઢ, નવી દિલ્હી, 22 ઓગસ્ટ (હિ.સ.). ઝારખંડમાં રામગઢ જિલ્લાના બરકાકાના ઓપી વિસ્તારના હેહલ ખાતે આવેલા સિમેન્ટ અને સ્ટીલ પાવર પ્લાન્ટમાં શુક્રવારે મોડી રાત્રે જોરદાર બ્લાસ્ટ થયો. આ અકસ્માતમાં ત્રણ એન્જિનિયરના મોત થયા, જ્યારે એક એન્જિનિયર ગંભીર રીતે ઘાયલ છે. ઘટના બાદ ફેક્ટરી પરિસરમાં અફરાતફરી મચી ગઈ. બરકાકાના પોલીસ સ્ટેશનના પ્રભારી ઉમાશંકર વર્મા ઘટનાસ્થળે પહોંચ્યા અને રાહત-બચાવ કાર્ય શરૂ કર્યું.

પ્રારંભિક માહિતી અનુસાર, અતિશય તાપમાનને કારણે પાવર પ્લાન્ટની સિસ્ટમ પર અસર પડી અને પ્રોટેક્શન સિસ્ટમ નિષ્ફળ ગઈ. આ દરમિયાન ટર્બાઇનના ઓવર સ્પીડ થવાને કારણે જોરદાર બ્લાસ્ટ થયો.

પોલીસના જણાવ્યા અનુસાર, આ અકસ્માતમાં જાગેશ્વર વિહાર બોકારોના રહેવાસી વિનીત મહતો, ધનબાદના સંજીવ કેસરી અને નગર ઉટારી, ગઢવાના અભિષેક પાંડેનું ઘટનાસ્થળે જ મોત થયું. હજારીબાગ જિલ્લાના રહેવાસી તરુણ રવાની ગંભીર રીતે ઘાયલ છે.

અકસ્માત બાદ પ્લાન્ટમાં કાર્યરત કર્મચારી અમિત કુમારે મેનેજમેન્ટની કાર્યપ્રણાલી પર સવાલો ઉઠાવ્યા. તેમણે આરોપ લગાવતા કહ્યું કે, પાવર પ્લાન્ટનો કંટ્રોલ રૂમ પહેલાથી જ વધુ તાપમાન હોવાનો સંકેત આપી રહ્યો હતો. ત્યાં એસી ખરાબ હોવાને કારણે કામ કરવું પણ મુશ્કેલ બની ગયું હતું. કર્મચારીઓ દ્વારા ઘણી વખત મેનેજમેન્ટને આ અંગે જાણ કરવામાં આવી હતી, પરંતુ મેનેજમેન્ટ દ્વારા કોઈ પણ પ્રકારનું એક્શન લેવામાં આવ્યું ન હતું, કે ન તો કૂલિંગ વ્યવસ્થાને સુધારવામાં આવી હતી.

આ તરફ, અકસ્માતથી આક્રોશિત લોકોએ શનિવારે રામગઢ પતરાતુ માર્ગને જામ કરી દીધો. પોલીસ અને મેનેજમેન્ટ વળતરને લઈને આક્રોશિત લોકો સાથે વાત કરી રહ્યા છે.

હિન્દુસ્થાન સમાચાર / અમિતેશ પ્રકાશ / વિકાસ કુમાર પાંડે / વીરેન્દ્ર સિંહ

હિન્દુસ્થાન સમાચાર / ડો.હિતેશ એન.વ્યાસ