- રૂ.1.99 લાખનો મુદ્દામાલ કબજે

- રોકડ રકમ, મોબાઈલ અને ચાર મોટરસાયકલ સહિતનો સામાન જપ્ત કરાયો છે.

કચ્છ, 23 ઓગસ્ટ (હિ.સ.) : મુંદરા તાલુકાના સમાઘોઘા ગામમાં ચાલતી જુગારની પ્રવૃત્તિ સામે મુંદરા પોલીસે કાર્યવાહી કરીને એકસાથે આઠ શખ્સોને ઝડપી પાડ્યા છે. બાતમીના આધારે કરવામાં આવેલી આ કાર્યવાહીમાં પોલીસે જુગાર રમતા શખ્સોને રંગેહાથ ઝડપી પાડ્યા હતા. દરોડા દરમિયાન રોકડ રકમ, મોબાઈલ ફોન અને મોટરસાયકલો સહિત કુલ રૂ.1.99 લાખ જેટલો મુદ્દામાલ કબજે કરવામાં આવ્યો છે.

મળતી માહિતી મુજબ, મુંદરા પોલીસ સ્ટેશન વિસ્તારમાં સમાઘોઘા ગામ ખાતે કેટલાક લોકો ગંજીપાના વડે જુગાર રમતા હોવાની પોલીસને ચોક્કસ બાતમી મળી હતી. બાતમીના આધારે પોલીસ ઇન્સ્પેક્ટર એમ.આર. શકોરીયાના માર્ગદર્શન હેઠળ સર્વેલન્સ સ્ટાફે સ્થળ પર પહોંચી કાર્યવાહી હાથ ધરી હતી. પોલીસની ટીમે સ્થળને ઘેરી લઈ જુગાર રમતા શખ્સોને ઝડપી પાડ્યા હતા.

પોલીસની કાર્યવાહીમાં વિકાંતભાઈ વિરજીભાઈ ગાલા, દિવ્યરાજસિંહ નિરૂભા જાડેજા, પ્રતિપાલસિંહ નટવરસિંહ જાડેજા, સિધ્ધરાજસિંહ પવુભા જાડેજા, હાર્દિકસિંહ બળવંતસિંહ જાડેજા, વિશ્વરાજસિંહ લગધીરસિંહ જાડેજા, વિશ્વરાજસિંહ ચંદ્રસિંહ ગોહિલ અને સૂર્યરાજસિંહ અજીતસિંહ રાઠોડને ઝડપી પાડવામાં આવ્યા હતા. તમામ શખ્સો સમાઘોઘા ગામના રહેવાસી હોવાનું પોલીસે જણાવ્યું છે.

દરોડા દરમિયાન પોલીસને સ્થળ પરથી રૂ.34,800ની રોકડ રકમ મળી આવી હતી. ઉપરાંત આશરે રૂ.70,000ની કિંમતના સાત મોબાઈલ ફોન તથા રૂ.95,000ની કિંમતની ચાર મોટરસાયકલ પણ કબજે કરવામાં આવી હતી. આ ઉપરાંત જુગાર રમવા માટે ઉપયોગમાં લેવાતા ગંજીપાના પણ પોલીસ દ્વારા જપ્ત કરવામાં આવ્યા હતા. આમ, સમગ્ર કાર્યવાહીમાં કુલ રૂ.1,99,800નો મુદ્દામાલ કબજે કરવામાં આવ્યો છે.

આ મામલે મુંદરા પોલીસે તમામ આઠ શખ્સો વિરુદ્ધ જુગારધારા હેઠળ ગુનો નોંધી કાયદેસરની કાર્યવાહી શરૂ કરી છે. સાથે જ આ જુગારની પ્રવૃત્તિ સાથે અન્ય કોઈ લોકો સંકળાયેલા છે કે કેમ અને આ સ્થળે લાંબા સમયથી જુગાર ચાલતો હતો કે નહીં તે સહિતની બાબતો અંગે પોલીસે વધુ તપાસ હાથ ધરી છે.

---------------

હિન્દુસ્થાન સમાચાર / Rohit Ramjibhai Padhiyar