-સાંજે કેવડિયાના એકતા નગરમાં રૂ. 280 કરોડથી વધુના વિકાસ પ્રોજેક્ટનું ઉદ્ઘાટન અને શિલાન્યાસ કરશે.
-બીજા દિવસે સવારે દેશના પ્રથમ ગૃહમંત્રી લોખંડી પુરૂષ સરદાર વલ્લભભાઈ પટેલની પ્રતિમા સ્ટેચ્યુ ઓફ યુનિટી પર પુષ્પાંજલિ અર્પણ કરશે.
નવી દિલ્હી, 30 ઓક્ટોબર (હિ.સ.). વડાપ્રધાન નરેન્દ્ર મોદી આજે ગુજરાત પહોંચી રહ્યા છે. તેઓ આવતીકાલે પણ પોતાના ગૃહ રાજ્યના પ્રવાસે જશે. આ સમયગાળા દરમિયાન વડાપ્રધાન મોદી 280 કરોડ રૂપિયાથી વધુના ખર્ચના વિવિધ પ્રોજેક્ટનું ઉદ્ઘાટન અને શિલાન્યાસ કરશે. ભારત સરકારના પ્રેસ એન્ડ ઇન્ફર્મેશન બ્યુરો (પીઆઈબી) એ વડાપ્રધાનની ગુજરાત મુલાકાતની પૂર્વ સંધ્યાએ બહાર પાડેલા એક પ્રકાશનમાં આ માહિતી આપી હતી. ભારતીય જનતા પાર્ટી (ભાજપ) એ પણ તેના સત્તાવાર એક્સ હેન્ડલ પર વડાપ્રધાનના આજના કાર્યક્રમને શેર કર્યો છે.
અખબારી અને માહિતી કાર્યાલયની એક રીલીઝ મુજબ, કેવડિયાના એકતા નગર ખાતે આજે સાંજે લગભગ 5:30 વાગ્યે વડાપ્રધાન 280 કરોડ રૂપિયાથી વધુના ખર્ચના વિવિધ માળખાકીય અને વિકાસ પ્રોજેક્ટોનું ઉદ્ઘાટન અને શિલાન્યાસ કરશે. તેઓ લગભગ 6 વાગ્યે રાષ્ટ્રીય એકતા દિવસની પૂર્વ સંધ્યાએ 99મા કોમન ફાઉન્ડેશન કોર્સના અધિકારી તાલીમાર્થીઓને સંબોધિત કરશે. આ વર્ષના કાર્યક્રમની થીમ આત્મનિર્ભર અને વિકસિત ભારત માટે રોડમેપ છે. 99મો કોમન ફાઉન્ડેશન કોર્સ - આરંભ 6.0 - ભારતની 16 સિવિલ સેવાઓ અને ભૂતાનની 3 સિવિલ સેવાઓમાંથી 653 અધિકારી તાલીમાર્થીઓનો સમાવેશ કરે છે.
પીઆઈબી મુજબ, વડાપ્રધાન બીજા દિવસે સવારે લગભગ 7:15 વાગ્યે દેશના પ્રથમ ગૃહમંત્રી અને લોખંડી પુરૂષ સરદાર વલ્લભભાઈ પટેલની પ્રતિમા સ્ટેચ્યુ ઓફ યુનિટી પર પુષ્પાંજલિ અર્પણ કરશે. ત્યારબાદ રાષ્ટ્રીય એકતા દિવસની ઉજવણી કરવામાં આવશે. તે એકતા દિવસ પર દરેકને શપથ લેવડાવશે. વડાપ્રધાન આ પ્રસંગે યુનિટી ડે પરેડ પણ નિહાળશે. પરેડમાં નવ રાજ્યો અને એક કેન્દ્રશાસિત પ્રદેશની પોલીસની 16 ટુકડીઓ, ચાર કેન્દ્રીય સશસ્ત્ર પોલીસ દળો, એનસીસી અને માર્ચિંગ બેન્ડ સામેલ હશે. ખાસ આકર્ષણ એનએસજીની હેલ માર્ચ ટુકડી, બીએસએફ અને સીઆરપીએફના પુરૂષો અને મહિલા બાઈકર્સ દ્વારા સાહસિક પ્રદર્શન હશે. ભારતીય માર્શલ આર્ટના સંયોજન પર બીએસએફ નો શો પણ આકર્ષણનું કેન્દ્ર રહેશે. શાળાના બાળકો પાઇપ બેન્ડ શો રજૂ કરશે. આ દરમિયાન આકાશમાં એરફોર્સનો રોમાંચક સૂર્ય કિરણ ફ્લાયપાસ્ટ પણ જોવાલાયક રહેશે.
હિન્દુસ્થાન સમાચાર / મુકુંદ / ડો. હિતેશ
હિન્દુસ્થાન સમાચાર / ડો.હિતેશ એન.વ્યાસ
