નવી દિલ્હી, 18 સપ્ટેમ્બર (હિ.સ.). વડા પ્રધાન નરેન્દ્ર મોદીએ, બુધવારે 'એક દેશ એક ચૂંટણી' પર કેન્દ્રીય કેબિનેટના નિર્ણયની પ્રશંસા કરતા કહ્યું કે, તે આપણી લોકશાહીને વધુ ગતિશીલ અને સહભાગી બનાવવાની દિશામાં એક મહત્વપૂર્ણ પગલું છે.

વડા પ્રધાને, સોશિયલ મીડિયા પ્લેટફોર્મ એક્સ પર પોસ્ટ કરતા કહ્યું, “કેબિનેટે એક સાથે ચૂંટણીઓ અંગે ઉચ્ચ સ્તરીય સમિતિની ભલામણોને સ્વીકારી લીધી છે. આ પ્રયાસનું નેતૃત્વ કરવા અને વિવિધ હિતધારકોની સલાહ લેવા બદલ, હું અમારા ભૂતપૂર્વ રાષ્ટ્રપતિ રામનાથ કોવિંદની પ્રશંસા કરું છું. આપણી લોકશાહીને વધુ ગતિશીલ અને સહભાગી બનાવવાની દિશામાં આ એક મહત્વપૂર્ણ પગલું છે.

આ ઉપરાંત, વડા પ્રધાને, આજે કેન્દ્રીય કેબિનેટના અન્ય નિર્ણયો વિશે પણ પોસ્ટ કર્યું. તેમણે કહ્યું કે, અમે સમગ્ર દેશમાં આદિવાસી સમુદાયોના ઉત્થાન અને તેમના સામાજિક અને આર્થિક વિકાસ માટે સંકલ્પબદ્ધ છીએ. આ દિશામાં એક મોટી પહેલ કરીને અમે પ્રધાનમંત્રી આદિજાતિ ઉન્નત ગ્રામ અભિયાનને મંજૂરી આપી છે. આનાથી આપણા 5 કરોડથી વધુ આદિવાસી ભાઈ-બહેનોને ફાયદો થશે.

તેમણે કહ્યું કે, અમે અમારા ખેડૂત ભાઈઓ અને બહેનોના કલ્યાણ માટે સતત મોટા પગલા લઈ રહ્યા છીએ. આ સંદર્ભમાં, આજે અમારી સરકારે પ્રધાનમંત્રી અન્નદાતા આવક સુરક્ષા અભિયાનને મંજૂરી આપી છે. આનાથી ખેડૂતોને તેમના પાકના લાભકારી ભાવો મેળવવામાં મદદ મળશે જ પરંતુ ગ્રાહકોને પણ ફાયદો થશે. પ્રધાનમંત્રીએ કહ્યું કે, અમારા ખેડૂત ભાઈઓ અને બહેનોને પોષણક્ષમ દરે ખાતરનો સતત પુરવઠો સુનિશ્ચિત કરવા માટે, અમે 2024ની રવિ સિઝન માટે પોષક તત્વો આધારિત સબસિડીના દરોને મંજૂરી આપી છે. આ પગલાથી દેશભરના ખેડૂતો માટે ખેતીનો ખર્ચ પણ ઘટશે.

વડાપ્રધાને કહ્યું કે, કેબિનેટે 'બાયો-રાઈડ' યોજનાને મંજૂરી આપી છે, જે બાયોટેકનોલોજીના ક્ષેત્રમાં ભારતની પ્રગતિને આગળ લઈ જશે. નવીનતા, ધિરાણ અને ક્ષમતા નિર્માણ પર ભાર મૂકવામાં આવશે. આ યોજના ટકાઉ વિકાસને પણ પ્રોત્સાહન આપશે. તેમણે કહ્યું કે, એનિમેશન, વિઝ્યુઅલ ઇફેક્ટ્સ, ગેમિંગ, કોમિક્સ અને એક્સટેન્ડેડ રિયાલિટી માટે, નેશનલ સેન્ટર ઓફ એક્સેલન્સની સ્થાપના માટે કેબિનેટની મંજૂરી, મીડિયા અને મનોરંજનની દુનિયા માટે એક સારા સમાચાર છે. આ સર્જકોની ઇકો-સિસ્ટમને વેગ આપશે અને રોજગારીની ઘણી તકો ઊભી કરશે.

તેમણે કહ્યું કે, સ્પેસ સેક્ટર માટે સારા સમાચાર છે. કેન્દ્રીય કેબિનેટે ગગનયાન કાર્યક્રમનું વિસ્તરણ કરીને ભારતીય અવકાશ સ્ટેશન (BAS) તરફ પ્રથમ પગલું ભરવાની મંજૂરી આપી છે. આ ઐતિહાસિક નિર્ણય આપણને 2035 સુધીમાં સ્વ-નિર્ભર અવકાશ સ્ટેશન અને 2040 સુધીમાં માનવસહિત ચંદ્ર મિશનની નજીક લાવશે.

હિન્દુસ્થાન સમાચાર/સુશીલ કુમાર/દધીબલ યાદવ / ડો. માધવી

હિન્દુસ્થાન સમાચાર / માધવી વ્યાસ