સુરત, 24 ફેબ્રુઆરી (હિ.સ.)-ટેક્સટાઇલ અને હીરા નગરી તરીકે ઓળખાતા સુરત હવે ફેશનની દુનિયામાં પણ આગળ વધી રહ્યું છે. સુરતની યુવતીએ મિસ ઇન્ટર કોન્ટીનેન્ટલ સ્પર્ધાનો તાજ જીત્યો છે. ત્યારે સુરત એરપોર્ટ પર આવેલી યુવતીનું પરિવારજનો અને શહેરીજનોએ આદકેરું સ્વાગત કરવામાં આવ્યું હતું. ભારતભરની 14 યુવતીઓને મ્હાત આપીને હવે ઇન્ટરનેશનલ લેવલે ભારતનું પ્રતિનિધિત્વ કરવા માટે થનગની રહી છે.19 વર્ષીય કોલેજીયન યુવતી શ્રદ્ધા પટેલ દિલ્હી ખાતે યોજાયેલા કાસ્ટીગમાં હાજર રહી હતી. જ્યાં દેશભરમાંથી આવેલી 14 યુવતીઓને હરાવીને હવે મિસ ઈન્ટર કોન્ટિનેન્ટલ સ્પર્ધામાં આગળ વધવા જઈ રહી છે. મિસ ઇન્ટર કોન્ટિનેન્ટલ સ્પર્ધા આગામી સમયમાં ઈજિપ્તમાં યોજાનાર છે. જેના માટે શ્રદ્ધા ખૂબ જ ઉત્સાહિત છે.

ટેક્સટાઇલ અને એગ્રીકલ્ચર વ્યવસાય સાથે સંકળાયેલા ચંદ્રહાસ પટેલની દીકરી શ્રદ્ધા પટેલ બાળપણથી જ મોડેલિંગ ક્ષેત્રમાં આગળ વધવા માટે ઉત્સાહિત હતી. ત્યારે આજે ઇન્ટરનેશનલ લેવલે પ્રતિનિધિત્વ કરવાની તક મળતા સમગ્ર સુરતમાં ઉત્સાહનો માહોલ જોવા મળી રહ્યો છે. શ્રદ્ધા પટેલે કહ્યું કે, મને બાળપણથી જ આ ક્ષેત્રમાં આગળ વધવાની ઈચ્છતી હતી. આ અગાઉ હું મિસ ટીન ઇન્ડિયા 2021નો તાજ જીતી ચૂકી છું. સુરત વાવ એવોર્ડ, મિસ સ્ટાર ફ્રેશ ઓફ ઇન્ડિયા 2020 સહિતના અસંખ્ય એવોર્ડ જીતી ચૂકી છું. પિતાને કેન્સરનું ઓપરેશન 2019 માં થયું હોવા છતાં પણ તૈયારીઓમાં સતત સમય આપતી હતી. તેના કારણે જ આજે આ લેવલે પહોંચતા ખૂબ જ ગર્વ અને આનંદની લાગણી અનુભવી રહી છું.

શ્રદ્ધાની માતા વૈશાલી પટેલે કહ્યું કે, શ્રદ્ધા નાનપણથી જ ફેન્સી ડ્રેસ કોમ્પિટિશનમાં ભાગ લેતી હતી. સ્કૂલની તમામ સ્પર્ધાઓમાં શ્રદ્ધા વિજેતા થતી હતી. આજે ક્રાઉન તેના ચહેરા ઉપર આવ્યું છે. જેથી અમે ખૂબ જ હરખ અને ગર્વની લાગણી અનુભવી રહ્યા છીએ. ત્યારે આગામી સમયમાં આંતરરાષ્ટ્રીય સ્તરનું ક્રાઉન તેના માથા ઉપર આવેતેની અમે રાહ જોઈ રહ્યા છીએ. શ્રદ્ધા અને અમારા પરિવારે ખૂબ જ સહન અત્યાર સુધી કર્યું છે. કારણ કે સમાજમાંથી અને શહેરમાંથી મોડેલિંગ ક્ષેત્રમાં યુવતીઓ ન હોવાના કારણે ઘણી વખત અલગ અલગ કોમેન્ટ પણ સાંભળવી પડતી હતી. પરંતુ આજે તેની સફળતા એ બધી જ કોમેન્ટને ભુલાવી દે તેવી સાબિત થઈ છે. આજે અમારી આંખોમાં હર્ષના અશ્રુ જોવા મળી રહ્યા છે.

શ્રદ્ધા પટેલે કહ્યું કે, મારી ઈચ્છા છે કે, ઇન્ટર કોન્ટિનેન્ટલ સ્પર્ધાનું તાજ ભારતમાં ફરીથી આવે. વર્ષ 1997માં લારા દત્તા આ ક્રાઉન જીતી હતી. ત્યારબાદ ભારતનું પ્રતિનિધિત્વ ઘણી યુવતીઓ કરી ચૂકી છે. પરંતુ મારી 19 વર્ષની ઉંમરે બીબીએના અભ્યાસ કરતા કરતા જે પ્રકારની હું તૈયારી કરી રહી છું. તેને જોતા એવું લાગી છે કે, ફરીથી હું આ ક્રાઉન ભારત લાવીશે.આ માટે સાત પ્રકારની સ્પર્ધા યોજાતી હોય છે. જેમાં ટેલેન્ટ, ક્વેશન આન્સર, પર્સનલ ઇન્ટરવ્યૂ, રેમ્પવોક અને હિલ પર સાત દિવસ સુધી રહેવાનું કઠિન કાર્ય રહેતું હોય છે. જે તમામ તૈયારીઓ હું ખૂબ જ આકરી મહેનતથી કરી રહી છું.

---------------

હિન્દુસ્થાન સમાચાર / યજુવેન્દ્ર દુબે