પાટણ, 7 એપ્રિલ (હિ.સ.)

પાટણના ઐતિહાસિક શ્રીમંત ફતેહસિંહરાવ સાર્વજનિક પુસ્તકાલયમાં રવિવારે 'મને જાણો' કાર્યક્રમ યોજાયો, જે સ્વ. કિર્તીકુમાર જયસુખરામ પારધીના સૌજન્યથી યોજાયું હતું. આ કાર્યક્રમમાં રામનવમીના શુભ દિવસે વિશેષ વ્યાખ્યાન આપવામાં આવ્યું.વિદ્વાન વક્તા રસિકભાઈ મોદીએ 'જગદ્ગુરુ શંકરાચાર્ય' વિષય પર વક્તવ્ય આપ્યું. તેમણે શંકરાચાર્યના જીવન વિશે મહત્વપૂર્ણ માહિતી આપી અને તેમને આધુનિક હિંદુ ધર્મના જનક તરીકે ઓળખાવ્યા. તેઓએ શંકરાચાર્યના ચાર મુખ્ય શિષ્યોના જીવન વિશે પણ માહિતી આપી, જેમ કે મંડનમિશ્ર, આનંદગિરી, પદ્મપાદાચાર્ય અને હસ્તામલકાચાર્ય.કાર્યક્રમમાં લાઇબ્રેરીના દાતા કેતનભાઈ અમીન અને તેમની પત્ની ઉપસ્થિત રહ્યા. તેમણે લાઇબ્રેરીના કાર્યક્રમોને બિરદાવ્યા અને ભવિષ્યમાં સહયોગ આપવાની ખાતરી આપી. કાર્યક્રમની શરૂઆતમાં દીપ પ્રાગટ્ય કરી ભગવાન શ્રીરામ અને શંકરાચાર્યને નમન કરવામાં આવ્યા.

હિન્દુસ્થાન સમાચાર / પરમાર હાર્દિકકુમાર