લોસ એન્જલસ, નવી દિલ્હી, 12 જુલાઈ (હિ.સ.). ફેડરલ જજ મામે ઇવુસી-મેન્સા ફ્રિમ્પોંગે, શુક્રવારે અમેરિકન સિવિલ લિબર્ટીઝ યુનિયન (એસીએલયુ) નાગરિક અધિકાર મુકદ્દમાની તરફેણમાં ચુકાદો આપ્યો. ફેડરલ જજે ટ્રમ્પ પ્રશાસનને લોસ એન્જલસ અને કેલિફોર્નિયાના અન્ય કેટલાક કાઉન્ટીઓમાં ઇમિગ્રેશન દરોડા તાત્કાલિક અસ્થાયી રૂપે બંધ કરવાનો આદેશ આપ્યો. યુનાઇટેડ સ્ટેટ્સ ઇમિગ્રેશન અને કસ્ટમ્સ એન્ફોર્સમેન્ટ (આઈસીઈ) ઘણા દિવસોથી આ દરોડા પાડી રહ્યું છે. ન્યાયાધીશે કહ્યું કે આ દરોડા તાત્કાલિક બંધ કરવા જોઈએ.

સીબીએસ ન્યૂઝ ચેનલના સમાચાર અનુસાર, ડિસ્ટ્રિક્ટ જજ ફ્રિમ્પોંગે નિર્ણયમાં લખ્યું છે કે, આઈસીઈ યુનાઇટેડ સ્ટેટ્સના બંધારણના ચોથા સુધારાનું ઉલ્લંઘન કરી રહ્યું છે. ન્યાયાધીશે નક્કી કર્યું કે ફેડરલ એજન્ટો નક્કર પુરાવા વિના ધરપકડ કરી શકતા નથી.

એસીએલયુ અને ઇમિગ્રન્ટ અધિકાર જૂથોએ કાનૂની દસ્તાવેજમાં દાવો કર્યો હતો કે, ફેડરલ એજન્ટો જાતિવાદના આધારે લોકોની ધરપકડ કરી રહ્યા છે. તેઓ વોરંટ વિના દરોડા પાડી રહ્યા છે. લોકોને કાનૂની સલાહ લેવાની મંજૂરી નથી. ફેડરલ એજન્ટો ખુલ્લેઆમ બંધારણનું ઉલ્લંઘન કરી રહ્યા છે.

એસીએલયુ ના વકીલ મોહમ્મદ તાજસેરે કહ્યું, તેમની ત્વચાનો રંગ ગમે તે હોય, તેઓ કઈ ભાષા બોલે છે અથવા તેઓ ક્યાં કામ કરે છે તે મહત્વનું નથી, દરેકને ગેરકાયદેસર અટકાયતથી બચાવવા માટે બંધારણીય અધિકારો છે. જોકે, ટ્રમ્પ વહીવટીતંત્રના વકીલોએ ટ્રાયલ દરમિયાન આ દાવાઓને નકારી કાઢ્યા હતા.

યુએસ જસ્ટિસ ડિપાર્ટમેન્ટે ફેડરલ સરકાર આ નિર્ણય સામે અપીલ કરશે કે નહીં, તે અંગે કોઈ ટિપ્પણી કરી ન હતી. યુએસ એટર્ની બિલ એસ્પ્લીએ નિર્ણય પછી એક પોસ્ટમાં કહ્યું હતું કે, ફેડરલ એજન્ટો કાયદાનો અમલ કરવાનું ચાલુ રાખશે અને અમેરિકી બંધારણનું પાલન કરશે. અમે મુકદ્દમામાં લગાવવામાં આવેલા આરોપો સાથે સંપૂર્ણપણે અસંમત છીએ. અમારું માનવું છે કે, એજન્ટોએ ક્યારેય યોગ્ય કાનૂની સમર્થન વિના કોઈ વ્યક્તિને અટકાયતમાં લીધી નથી.

આ નિર્ણય પર, કેલિફોર્નિયાના ગવર્નર ગેવિન ન્યુસોમે કહ્યું, આજે ન્યાયનો વિજય થયો. કોર્ટના નિર્ણયથી ફેડરલ ઇમિગ્રેશન અધિકારીઓને લોકોના અધિકારોનું ઉલ્લંઘન અને વંશીય ભેદભાવ કરવાથી અસ્થાયી રૂપે રોકી દેવામાં આવ્યા છે. એવો, અહેવાલ છે કે ફેડરલ જજ ફ્રિમ્પોંગે બે કામચલાઉ પ્રતિબંધના આદેશો જારી કર્યા છે.

નોંધનીય છે કે, જજ ફ્રિમ્પોંગની નિમણૂક ભૂતપૂર્વ રાષ્ટ્રપતિ બાઈડેન દ્વારા કરવામાં આવી હતી. તેમના નિર્ણયમાં, ફ્રિમ્પોંગે ટ્રમ્પ વહીવટની કડક ટીકા કરી છે. ફ્રિમ્પોંગે નિર્ણયમાં લખ્યું છે કે, કોઈપણ શંકા વિના પેટ્રોલિંગ ટીમનું ફરવું એ બંધારણના ચોથા સુધારાનું ઉલ્લંઘન છે અને વકીલોને પ્રવેશ ન આપવો એ બંધારણના પાંચમા સુધારાનું ઉલ્લંઘન છે.

આ કેસના કેન્દ્રમાં મોન્ટેબેલોના રહેવાસી બ્રાયન ગાવિડિયા છે. ગયા મહિને ઇમિગ્રેશન એજન્ટો દ્વારા તેમની અટકાયત કરવામાં આવી હતી. ગાવિડિયાએ ગુરુવારે લોસ એન્જલસમાં કોર્ટની બહાર કહ્યું હતું કે, હું અમેરિકન છું એમ કહેવા અને સાબિત કર્યા પછી પણ, એજન્ટોએ મારો ફોન છીનવી લીધો.

હિન્દુસ્થાન સમાચાર / મુકુન્દ

હિન્દુસ્થાન સમાચાર / ડો.હિતેશ એન.વ્યાસ