ચંડીગઢ, નવી દિલ્હી, 22 સપ્ટેમ્બર (હિ.સ.) લોકસભામાં વિરોધ પક્ષના નેતા રાહુલ ગાંધીએ પંજાબના પૂરગ્રસ્ત વિસ્તારો માટે આપવામાં આવેલા રાહત પેકેજ પર સવાલ ઉઠાવ્યા છે અને તેને અપૂરતું ગણાવ્યું છે. તેમણે તેને પંજાબના લોકો સાથે અન્યાય ગણાવ્યો છે. તેમણે વડાપ્રધાનને તાત્કાલિક વ્યાપક રાહત પેકેજ જાહેર કરવા અપીલ કરી છે.

રાહુલ ગાંધીએ તાજેતરમાં પંજાબની મુલાકાત લીધી હતી. રાવી નદી પારના ગામડાઓની મુલાકાત લેવાની મનાઈ ના કારણે રાજકારણ ગરમાયું છે. સુરક્ષાના કારણોસર, પંજાબ પોલીસે તેમને પાકિસ્તાનની સરહદે આવેલા ગામડાઓની મુલાકાત લેતા અટકાવ્યા હતા. સોમવારે, રાહુલ ગાંધીએ તેમના સોશિયલ મીડિયા એકાઉન્ટ્સ પર લખ્યું કે, તેમને સંપૂર્ણ વિશ્વાસ છે કે લોકો ફરી એકવાર પંજાબનું નિર્માણ કરશે; તેમને ફક્ત સમર્થન અને શક્તિની જરૂર છે. તેમણે 10 મિનિટનો વીડિયો પણ શેર કર્યો, જેમાં લોકો સાથેની તેમની વાતચીતનો સમાવેશ થાય છે.

રાહુલ ગાંધીએ પોતાની પોસ્ટમાં લખ્યું છે કે, પૂરને કારણે પંજાબને આશરે ₹20,000 કરોડનું નુકસાન થયું છે. આવી સ્થિતિમાં, પ્રધાનમંત્રી દ્વારા જાહેર કરાયેલ 1600 કરોડ રૂપિયાનું પ્રારંભિક રાહત પેકેજ પંજાબના લોકો સાથે અન્યાય છે. લાખો ઘરો નાશ પામ્યા છે, 4 લાખ એકરથી વધુ જમીન પરનો પાક બરબાદ થઈ ગયો છે, અને મોટી સંખ્યામાં પ્રાણીઓ વહી ગયા છે. છતાં, પંજાબના લોકોએ નોંધપાત્ર હિંમત અને જુસ્સો દર્શાવ્યો છે. તેમણે કહ્યું, મને પૂર્ણ વિશ્વાસ છે કે તેઓ ફરી એકવાર પંજાબનું નિર્માણ કરશે, તેમને ફક્ત સમર્થન અને શક્તિની જરૂર છે. હું ફરી એકવાર પ્રધાનમંત્રીને તાત્કાલિક વ્યાપક રાહત પેકેજ બહાર પાડવા વિનંતી કરું છું.

હિન્દુસ્થાન સમાચાર / સંજીવ શર્મા / સુનિત નિગમ

હિન્દુસ્થાન સમાચાર / ડો.હિતેશ એન.વ્યાસ