પેરિસ (ફ્રાન્સ), નવી દિલ્હી, 8 જાન્યુઆરી (હિ.સ.). ફ્રાન્સની મુલાકાતે પહોંચેલા ભારતીય વિદેશ મંત્રી ડૉ. એસ. જયશંકરે, પહેલીવાર વાઇમર (જર્મની, ફ્રાન્સ અને પોલેન્ડ) ના તેમના સમકક્ષો સાથે વૈશ્વિક મુદ્દાઓ પર ચર્ચા કરી. તેમની મુલાકાત દરમિયાન ડૉ. જયશંકરે, ભારત-યુરોપિયન યુનિયન સંબંધોને મજબૂત બનાવવા અને ઈન્ડો-પેસિફિક સામેના પડકારો પર ચર્ચા કરી.

ડૉ. જયશંકરે, એક્સ-પોસ્ટ પર એક ફોટો સાથે આ માહિતી શેર કરી. તેમણે જણાવ્યું હતું કે, બેઠક દરમિયાન યુક્રેન સંઘર્ષ પરના વિચારો શેર કરવામાં આવ્યા હતા. ભારતે ખુલ્લી અને સ્પષ્ટ ચર્ચામાં આ મુદ્દાઓ પર પોતાના વિચારો રજૂ કર્યા. બેઠક બાદ, એક સંયુક્ત પત્રકાર પરિષદમાં વિશ્વને, વાઇમર અને ભારતના વલણ વિશે માહિતી આપવામાં આવી.

અગાઉ, ફ્રાન્સના વિદેશ મંત્રી જીન-નોએલ બેરોટને મળ્યા બાદ, ભારતીય વિદેશ મંત્રી ડૉ. જયશંકરે જણાવ્યું હતું કે, યુરોપ એક મુખ્ય વૈશ્વિક ખેલાડી છે અને ભારત-યુરોપિયન સંબંધોનું મજબૂત બનવું જરૂરી છે. ભારત અને ફ્રાન્સ વૈશ્વિક રાજકારણ અને અર્થતંત્રમાં સ્થિરતા લાવી શકે છે. જયશંકરે નોંધ્યું હતું કે, ભારત આગામી થોડા અઠવાડિયામાં જર્મન ચાન્સેલર ફ્રેડરિક મેર્ઝ, ફ્રેન્ચ રાષ્ટ્રપતિ ઇમેન્યુઅલ મેક્રોન અને ટોચના ઈયુ નેતાઓની યજમાની કરશે.

ઉલ્લેખનીય છે કે, ઇન્ડો-પેસિફિક એક ઉભરતું ભૂ-રાજકીય અને આર્થિક કેન્દ્ર છે. તેમાં હિંદ મહાસાગર અને પેસિફિક મહાસાગરની આસપાસના દેશો અને પાણીનો સમાવેશ થાય છે. તે પૂર્વ આફ્રિકાના દરિયાકાંઠેથી પશ્ચિમ પેસિફિક મહાસાગર સુધી ફેલાયેલું છે અને વિશ્વની મોટાભાગની વસ્તી અને અર્થતંત્રનું કેન્દ્ર છે. ભારત, ચીન, યુનાઇટેડ સ્ટેટ્સ, જાપાન અને ઓસ્ટ્રેલિયા જેવા દેશો આ ક્ષેત્રમાં મહત્વપૂર્ણ ભૂમિકા ભજવે છે. આ ક્ષેત્ર વેપાર, સુરક્ષા અને દરિયાઈ માર્ગો માટે મહત્વપૂર્ણ છે.

તે વૈશ્વિક શક્તિ સંતુલન અને દરિયાઈ સુરક્ષા માટે મહત્વપૂર્ણ છે. ભારત તેને મુક્ત, ખુલ્લું અને સમાવિષ્ટ ક્ષેત્ર માને છે. આઈપીઓઆઈ (ઇન્ડો-પેસિફિક મહાસાગર પહેલ) એ દરિયાઈ સુરક્ષા અને સહયોગને મજબૂત બનાવવા માટે રચાયેલ એક ભારતીય પહેલ છે. યુનાઇટેડ સ્ટેટ્સ પણ આ ક્ષેત્રમાં રસ ધરાવે છે. તેણે આઈપીઈએફ (ઇન્ડો-પેસિફિક આર્થિક માળખું) શરૂ કર્યું છે. સારમાં, આ એક આર્થિક સહયોગ માળખું છે. તેમાં 14 દેશોનો સમાવેશ થાય છે.

હિન્દુસ્થાન સમાચાર / મુકુન્દ

હિન્દુસ્થાન સમાચાર / ડો.હિતેશ એન.વ્યાસ