અમરેલી, 25 ઓક્ટોબર (હિ.સ.) : અમરેલી વિધાનસભા ક્ષેત્રના કેરાળા ગામે વિકાસકાર્યને નવી ગતિ આપવા માટે મહત્વપૂર્ણ પહેલ કરવામાં આવી છે. કેરાળા-મોટામાંડવડા રોડના રિસર્ફેસિંગ કામનું વિધિવત ખાતમુહૂર્ત રાજ્યમંત્રી કૌશિકભાઈ વેકરિયા અને સાંસદ ભરતભાઈ સુતરીયાના હસ્તે કરવામાં આવ્યું હતું. અંદાજિત ₹80 લાખના ખર્ચે આ માર્ગનું નવીનીકરણ કરવામાં આવશે.
આ માર્ગનું રિસર્ફેસિંગ કામ પૂર્ણ થયા બાદ કેરાળા અને મોટામાંડવડા ગામ વચ્ચેનું પરિવહન વધુ સરળ, ઝડપી અને સલામત બનશે. ખાસ કરીને સ્થાનિક ખેડૂતો, વિદ્યાર્થીઓ, નોકરિયાતો અને ગ્રામજનોને રોજિંદા આવાગમનમાં મોટી રાહત મળવાની આશા છે.
ગ્રામ્ય વિસ્તારોમાં રસ્તાઓની સુવિધા મજબૂત બને તો ખેતીવાડી સહિતની આર્થિક પ્રવૃત્તિઓને પણ વેગ મળે છે. સારા રસ્તાઓના કારણે ખેડૂતોને પોતાના ખેતપેદાશો બજાર સુધી પહોંચાડવામાં સરળતા રહે છે. ઉપરાંત વિદ્યાર્થીઓને શાળાએ જવા-આવવામાં અને ગ્રામજનોને આરોગ્ય સહિતની જરૂરી સેવાઓ મેળવવામાં પણ સુવિધા મળશે.
અમરેલી વિધાનસભા ક્ષેત્રમાં માળખાકીય સુવિધાઓના વિકાસની દિશામાં આ માર્ગનું નવીનીકરણ મહત્વપૂર્ણ બની રહેશે. ₹80 લાખના અંદાજિત ખર્ચે હાથ ધરાનારા આ કાર્યથી બંને ગામના લોકોને વધુ સારી માર્ગ સુવિધા ઉપલબ્ધ થવાની અપેક્ષા છે.
---------------
હિન્દુસ્થાન સમાચાર / Gondaliya Abhishek Nandrambhai
