રાયપુર, નવી દિલ્હી, 26 ઓક્ટોબર (હિ.સ.). છત્તીસગઢના રાયપુર-બિલાસપુર રાષ્ટ્રીય ધોરીમાર્ગ 130 પર સોમવારે સવારે લગભગ સાડા પાંચ વાગ્યે માર્ગ અકસ્માત થયો. બલોદાબજાર જિલ્લાના સિમગા પોલીસ સ્ટેશન વિસ્તારના દરચુરા નજીક તેજ ગતિવાળી મુસાફર બસ ઉભેલા ટ્રકમાં ઘૂસી ગઈ. આ ઘટનામાં 3 મુસાફરોના મોત થયા હોવાની માહિતી મળી છે, જ્યારે 10 લોકો ઘાયલ થયા હોવાનું જણાવાઈ રહ્યું છે. મૃતકોની ઓળખ કરવામાં આવી રહી છે.

સિમગા પોલીસના જણાવ્યા અનુસાર, રોયલ ટ્રાવેલ્સની બસ (સીજી 04 એનએમ 0859) સોમવારે સવારે અંબિકાપુરથી મુસાફરોને લઈને રાયપુર માટે નીકળી હતી. મોટાભાગના મુસાફરો ઊંઘમાં હતા. બસમાં લગભગ 22 મુસાફરો સવાર હતા. રસ્તા પર તેજ ગતિએ દોડી રહેલી બસ સવારે લગભગ 5:30 વાગ્યે દરચુરા નજીક ઉભેલા ટ્રકમાં ઘૂસી ગઈ.

જણાવવામાં આવ્યું છે કે, ટ્રકની આસપાસ ડ્રાઇવરોને સાવચેત કરવા માટે ટ્રાફિક કોન (ચેતવણી સંકેત) લગાવવામાં આવ્યા હતા, પરંતુ તેજ ગતિવાળી બસનો ડ્રાઇવર કદાચ તેમને જોઈ શક્યો નહીં અને બસ સીધી ટ્રકના પાછળના ભાગમાં ઘૂસી ગઈ. મુસાફરોને સંભાળવાનો મોકો પણ મળ્યો નહીં. 3 લોકોનું ઘટનાસ્થળે જ મોત થયું. જ્યારે 8 થી 10 લોકો ગંભીર રીતે ઘાયલ થયા છે.

ટક્કર એટલી જોરદાર હતી કે, મુસાફરો બસમાં ખરાબ રીતે ફસાઈ ગયા, જેમને બાદમાં ગેસ કટરની મદદથી બહાર કાઢવામાં આવ્યા. ઘટનાની જાણ થતા જ સિમગા પોલીસ સ્ટેશનની પોલીસ અને ડાયલ 112ની ટીમ ઘટનાસ્થળે પહોંચી. ઘાયલોને તાત્કાલિક સારવાર માટે સિમગા સામુદાયિક આરોગ્ય કેન્દ્ર મોકલવામાં આવ્યા છે, જ્યાં તેમની સારવાર ચાલી રહી છે. જ્યારે મૃતકોના મૃતદેહને પંચનામા બાદ પોસ્ટમોર્ટમ માટે મોકલી દેવામાં આવ્યા છે.

ઘટના બાદ મૃતકોની ઓળખ થઈ શકી નથી. હાલ પોલીસ બંને વાહનોને રસ્તા પરથી હટાવીને એક બાજુ કરી રહી છે, જેથી વાહનવ્યવહાર અવરોધાય નહીં. પોલીસ અકસ્માતના કારણોની તપાસમાં લાગી છે. નોંધનીય છે કે, રવિવારે કોરિયા જિલ્લામાં ચર્ચા પોલીસ સ્ટેશન વિસ્તારના નગર ગામ નજીક બસ અને બોલેરો વચ્ચે ટક્કર થઈ હતી. આ દુર્ઘટનામાં બોલેરોમાં સવાર એક મહિલાનું મોત થયું, જ્યારે ચાર બાળકો સહિત 14 લોકો ઘાયલ થયા. આ પહેલા ગુરુવારે મનંદ્રગઢથી કેલ્હારી જઈ રહેલી મુસાફરોથી ભરેલી એક તેજ ગતિવાળી બસ સેમરમથાની વળાંક પર અનિયંત્રિત થઈને ઝાડ સાથે અથડાઈ હતી. આ અકસ્માતમાં 6 લોકોના મોત થયા અને ઘણા લોકો ઘાયલ થયા.

હિન્દુસ્થાન સમાચાર / કેશવ કેદારનાથ શર્મા / મુકુંદ

હિન્દુસ્થાન સમાચાર / ડો.હિતેશ એન.વ્યાસ