નવી દિલ્હી, 26 ઓક્ટોબર (હિ.સ.). રાષ્ટ્રપતિ દ્રૌપદી મુર્મુ, ઉપરાષ્ટ્રપતિ સીપી રાધાકૃષ્ણન અને રક્ષામંત્રી રાજનાથ સિંહ સહિત અનેક નેતાઓએ સોમવારે મહર્ષિ વાલ્મીકિ જયંતિના અવસરે દેશવાસીઓને અભિનંદન અને શુભેચ્છાઓ પાઠવી.

રાષ્ટ્રપતિએ એક્સ પર લખ્યું, મહર્ષિ વાલ્મીકિ દ્વારા રચિત મહાકાવ્ય 'રામાયણ'માંથી આપણને કર્તવ્ય, સદાચાર, નિસ્વાર્થ કર્મ, પરોપકાર, મિત્રતા, ત્યાગ, ધર્મ અને ભક્તિના ઉપદેશો સહેલાઈથી પ્રાપ્ત થાય છે. આ મહાન ગ્રંથના શાશ્વત મૂલ્યો આપણા જીવન પર અમીટ છાપ છોડે છે. મારી કામના છે કે, બધા દેશવાસીઓ રામાયણમાં દર્શાવેલ આદર્શોને અપનાવીને, પોતાના વ્યક્તિગત અને સામાજિક જીવનમાં નિરંતર પ્રગતિના પથ પર આગળ વધતા રહે.

ઉપરાષ્ટ્રપતિએ કહ્યું કે, આદિકવિ મહર્ષિ વાલ્મીકિ દ્વારા રચિત રામાયણ, ભારતીય સંસ્કૃતિ અને સભ્યતાગત મૂલ્યોની એક અમૂલ્ય ધરોહર છે. તેમાં સમાવિષ્ટ સત્ય, કર્તવ્ય, ત્યાગ, કરુણા અને ધર્મના આદર્શો આજે પણ માનવતાનું માર્ગદર્શન કરે છે. તેમની શિક્ષાઓ સૌને હંમેશા નૈતિક મૂલ્યો અપનાવવા અને એક સૌહાર્દપૂર્ણ, સંવેદનશીલ તથા સશક્ત સમાજના નિર્માણ માટે પ્રેરિત કરતી રહેશે.

લોકસભા અધ્યક્ષ ઓમ બિરલાએ કહ્યું કે, મહર્ષિ વાલ્મીકિએ રામાયણના માધ્યમથી સત્ય, ધર્મ, સન્માન, કર્તવ્ય અને ત્યાગ જેવા મૂલ્યોને જન-જન સુધી પહોંચાડ્યા. મહર્ષિ વાલ્મીકિનું જીવન શીખવે છે કે, આત્મ-ચિંતન, ભક્તિ અને જ્ઞાનના માધ્યમથી કોઈપણ વ્યક્તિ પોતાના જીવનમાં સકારાત્મક બદલાવ લાવી શકે છે. તેમના કાર્યો અને વિચારો હંમેશા સૌનું માર્ગદર્શન કરતા રહેશે.

રાજનાથ સિંહે કહ્યું કે, આદિકવિ મહર્ષિ વાલ્મીકિએ પોતાની અમર રચના 'રામાયણ'ના માધ્યમથી ભગવાન શ્રી રામના આદર્શો, સત્ય, ધર્મ અને લોક-કલ્યાણનો સંદેશ જન-જન સુધી પહોંચાડ્યો. તેમની રચનાઓ ભારતીય સંસ્કૃતિ, નૈતિક મૂલ્યો અને માનવીય સંવેદનાઓનો અમૂલ્ય ખજાનો છે. મહર્ષિ વાલ્મીકિજીને શત-શત નમન, જે સમાજને સદાચાર, સદ્ભાવ અને એક આદર્શ જીવન જીવવાની પ્રેરણા આપે છે.

કેન્દ્રીય ગૃહ અને સહકારિતા મંત્રી અમિત શાહે કહ્યું કે, તપ, જ્ઞાન અને કરુણાની પ્રતિમૂર્તિ મહર્ષિ વાલ્મીકિએ રામાયણના માધ્યમથી મર્યાદા પુરુષોત્તમ ભગવાન શ્રી રામજીના જીવનને જન-જન સુધી પહોંચાડ્યું અને આ પ્રકારે સંપૂર્ણ માનવતાને કર્તવ્ય અને ધર્મના માર્ગ પર ચાલવાની પ્રેરણા આપી. તેમના આ અદ્વિતીય યોગદાન માટે માનવ સમાજ હંમેશા તેમનો ઋણી રહેશે.

વિદેશ મંત્રી ડો. એસ. જયશંકરે કહ્યું કે, સત્ય, કરુણા અને નૈતિક આચરણ પર મહર્ષિ વાલ્મીકિની શાશ્વત શિક્ષાઓ હંમેશા પ્રેરિત કરતી રહેશે.

કેન્દ્રીય કૃષિ અને કિસાન કલ્યાણ મંત્રી શિવરાજ સિંહ ચૌહાણે કહ્યું કે, મહાકાવ્ય 'રામાયણ'ના રચયિતા, 'આદિકવિ' મહર્ષિ વાલ્મીકિએ સંપૂર્ણ માનવજાતિને મર્યાદા પુરુષોત્તમ ભગવાન શ્રી રામના આદર્શ ચરિત્રથી પરિચિત કરાવ્યા. તેમના પવિત્ર વિચારો સૌને શુદ્ધ આચરણ સાથે સંયમ, સત્ય અને કર્તવ્યનું નિષ્ઠાપૂર્વક પાલન કરવાની શિક્ષા આપે છે અને પ્રેરિત કરે છે કે ભવિષ્યમાં પણ આવું જ કરતા રહેશે.

હિન્દુસ્થાન સમાચાર / શ્રદ્ધા દ્વિવેદી / મુકુંદ

હિન્દુસ્થાન સમાચાર / માધવી વ્યાસ