સુરેન્દ્રનગર,26 ઓકટોબર (હિ.સ.) રાજ્યભરમાં હાલ ચાલી રહેલી સામાન્ય મતદાર યાદી ખાસ સંક્ષિપ્ત સુધારણા કાર્યક્રમની કામગીરીના ભાગરૂપે સુરેન્દ્રનગર જિલ્લા કલેક્ટર જી.એચ.સોલંકી દ્વારા વઢવાણ વિધાનસભા મતવિસ્તારની સ્થળ મુલાકાત લેવામાં આવી હતી.

આ મુલાકાત દરમિયાન તેમણે બૌદ્ધ વિદ્યાલય પ્રાથમિક શાળા ખાતે આવેલા મતદાન મથક નંબર 2523,254 અને 255 પર પહોંચીને ચાલી રહેલી કામગીરીનું પ્રત્યક્ષ નિરીક્ષણ કર્યું હતું. આ તકે વઢવાણ પ્રાંત અધિકારી મેહુલ ભરવાડ પણ ઉપસ્થિત રહ્યાં હતાં.

મુલાકાત વેળાએ કલેક્ટરએ મતદાન મથકો પર ઉપસ્થિત બી.એલ.ઓ. (BLO) ઓ દ્વારા નવા મતદારોના નામ ઉમેરવા (ફોર્મ નં.6), નામ કમી કરવા (ફોર્મ નં. 7), તેમજ વિગતોમાં સુધારા-વધારા કરવા કે સરનામું બદલવા (ફોર્મ નં. 8 ) માટે મેળવેલી અરજીઓ અને રજિસ્ટરની વિગતવાર ચકાસણી કરી હતી.

આ તકે તેમણે બી.એલ.ઓ.ને સૂચના આપી હતી કે 18 વર્ષ પૂરા કરનાર દરેક યુવા મતદારનું નામ યાદીમાં ઉમેરાય અને કોઈ પણ પાત્ર નાગરિક મત આપવાના અધિકારથી વંચિત ન રહે તે સુનિશ્ચિત કરવું. આ સાથે જ મતદાર યાદી સુધારણાલક્ષી તમામ અરજીઓનો ઝડપી, પારદર્શી અને ક્ષતિરહિત નિકાલ લાવવા માટે જરૂરી માર્ગદર્શન પૂરું પાડ્યું હતું.

હિન્દુસ્થાન સમાચાર / હર્ષ શાહ