મુંબઈ, નવી દિલ્હી, 29 ઓક્ટોબર (હિ.સ.) અભિનેતા મનોજ બાજપેયીએ બોલીવુડની કાર્યશૈલી અને ઉદ્યોગમાં પોતાની ઓળખને લઈને સ્પષ્ટ મત વ્યક્ત કર્યો છે. લાંબા સમયથી ફિલ્મ જગતમાં સક્રિય હોવા છતાં પણ મનોજ આજે પણ પોતાને બોલીવુડનો ભાગ અનુભવતા નથી.

તેમણે કહ્યું, હું ફિલ્મ ઉદ્યોગનો ભાગ છું, છતાં પણ મને નથી લાગતું કે હું અહીંનો છું. અભિનેતાના મતે ફિલ્મ ઉદ્યોગને એક પરિવારની જેમ રજૂ કરવું વાસ્તવિકતાથી દૂર છે. અહીં પ્રતિભા અને મહેનતની સાથે-સાથે ઓળખાણ પણ મહત્વ ધરાવે છે, જ્યારે કલાકારો વચ્ચે એકબીજાની સફળતાની ઉજવણી કરવાની ભાવના ઓછી જ જોવા મળે છે.

મનોજનું માનવું છે કે, કોઈ કલાકારની સાચી ઓળખ તેના કામ અને કૌશલ્યથી બને છે. તેમના માટે વ્યક્તિગત સંબંધો અને લોકોની પ્રશંસા કરતાં વધુ મહત્વપૂર્ણ પોતાના કામ પ્રત્યે ઈમાનદાર રહેવું છે. અભિનેતાનો ભાર આ વાત પર છે કે કલાકારે પોતાની કલા પર ધ્યાન આપવું જોઈએ અને સતત સારું કામ કરવાનો પ્રયાસ કરવો જોઈએ. તેમના મતે કોઈપણ ક્ષેત્રમાં લાંબા સમય સુધી ટકી રહેવા માટે કૌશલ્ય પ્રત્યેની લગન અને કામની ગુણવત્તા સૌથી મહત્વપૂર્ણ હોય છે.

આ દિવસોમાં મનોજ બાજપેયી નેટફ્લિક્સની વેબ શ્રેણી 'ગજબ રાત'માં જોવા મળી રહ્યા છે. પોતાની કારકિર્દીમાં તેમણે અલગ-અલગ પ્રકારના પાત્રો દ્વારા અભિનયની પોતાની અલગ ઓળખ બનાવી છે. બોલીવુડમાં જૂથબંધી અને પરસ્પર સંબંધોને લઈને તેમની સ્પષ્ટ ટિપ્પણીઓ એકવાર ફરી ચર્ચામાં છે. મનોજની વાતો પરથી સ્પષ્ટ છે કે તેઓ ફિલ્મ ઉદ્યોગમાં પોતાની જગ્યાને સંબંધો કે વાહવાહીને બદલે પોતાના કામના દમ પર કાયમ રાખવા માંગે છે.

હિન્દુસ્થાન સમાચાર / લોકેશ ચંદ્ર દુબે / પવન કુમાર

હિન્દુસ્થાન સમાચાર / માધવી વ્યાસ