નવી દિલ્હી, 31 ઓક્ટોબર (હિ.સ.). રાજધાની દિલ્હીના મંગોલપુરી ઔદ્યોગિક વિસ્તારમાં, શુક્રવારે રાત્રે એક જૂતા બનાવતી ફેક્ટરીમાં ભીષણ આગ લાગવાથી મોટો અકસ્માત થયો. આ દર્દનાક ઘટનામાં 4 મજૂરોના મોત થયા, જ્યારે અન્ય 2 ઘાયલ થયા. ઘાયલોને સારવાર માટે સંજય ગાંધી મેમોરિયલ હોસ્પિટલમાં દાખલ કરવામાં આવ્યા છે. પ્રારંભિક માહિતી અનુસાર, બેઝમેન્ટમાં લાગેલી આગ પછી આખી ઇમારતમાં ધુમાડો ફેલાઈ ગયો, જેના કારણે ઘણા મજૂરો બેહોશ થઈ ગયા.

માહિતી અનુસાર, મંગોલપુરી ઔદ્યોગિક વિસ્તાર ફેઝ-1 માં આવેલી જૂતા ફેક્ટરીમાં શુક્રવારે રાત્રે લગભગ 9 વાગ્યેને 32 મિનિટે આગ લાગવાની જાણ થઈ. જાણ થતા જ દિલ્હી ફાયર સર્વિસ અને પોલીસની ટીમો ઘટનાસ્થળે પહોંચી ગઈ. આગ બુઝાવવા અને લોકોને સુરક્ષિત બહાર કાઢવા માટે ફાયર બ્રિગેડની લગભગ 20 ગાડીઓ તૈનાત કરવામાં આવી.

ફાયર બ્રિગેડના અધિકારીઓ અનુસાર, આગ સૌથી પહેલા ફેક્ટરીના બેઝમેન્ટમાં લાગી હતી. ત્યારબાદ ભારે માત્રામાં ધુમાડો ઉપરના માળ સુધી ફેલાઈ ગયો. ધુમાડાના કારણે ફેક્ટરીની અંદર હાજર મજૂરોને બહાર નીકળવામાં મુશ્કેલી પડી. રાહત અને બચાવ અભિયાન દરમિયાન ફાયર બ્રિગેડના જવાનોએ ફેક્ટરીની અંદરથી 6 લોકોને બેભાન અવસ્થામાં બહાર કાઢ્યા. તમામને તાત્કાલિક સંજય ગાંધી મેમોરિયલ હોસ્પિટલ પહોંચાડવામાં આવ્યા, જ્યાં ડોકટરોએ 4 લોકોને મૃત જાહેર કર્યા. અન્ય 2 ઘાયલોની સારવાર ચાલુ છે. એક વ્યક્તિ ત્રીજા માળની સીડીઓ પાસે મળ્યો, જ્યારે અન્ય 5 લોકોને ચોથા માળેથી બહાર કાઢવામાં આવ્યા. ભારે ધુમાડાના કારણે બચાવ અભિયાનમાં ઘણી મુશ્કેલીઓનો સામનો કરવો પડ્યો.

અધિકારીઓ અનુસાર, ફેક્ટરીનો ઉપયોગ જૂતા બનાવવા અને સંગ્રહ એકમ તરીકે કરવામાં આવી રહ્યો હતો. બેઝમેન્ટમાં લાગેલી આગને ફાયર બ્રિગેડના જવાનોએ ઘણી જહેમત બાદ નિયંત્રિત કરી લીધી. જોકે, આગમાંથી નીકળેલો ધુમાડો ઇમારતની ઉપરની મંજિલો સુધી ફેલાઈ ગયો, જેના કારણે મજૂરો તેની ઝપેટમાં આવી ગયા. ફાયર વિભાગે આગ પર કાબૂ મેળવ્યા બાદ ઇમારતમાં સર્ચ ઓપરેશન ચલાવ્યું. સાથે જ કુલિંગનું કામ પણ કરવામાં આવ્યું, જેથી ફરીથી આગ લાગવાની આશંકાને ખતમ કરી શકાય.

આઉટર જિલ્લાના ડીસીપીએ જણાવ્યું કે, આગ લાગવાના કારણોની તપાસ કરવામાં આવી રહી છે. પોલીસે ફેક્ટરી માલિકને પૂછપરછ માટે બોલાવ્યા છે. આ ઉપરાંત કોન્ટ્રાક્ટર અને ફેક્ટરીના કર્મચારીઓની પણ પૂછપરછ કરવામાં આવી રહી છે. પોલીસ એ જાણવાનો પ્રયાસ કરી રહી છે કે, અકસ્માત સમયે ફેક્ટરીમાં કુલ કેટલા મજૂરો હાજર હતા અને ત્યાં આગ સલામતીની પૂરતી વ્યવસ્થા કરવામાં આવી હતી કે નહીં.

હાલમાં, આગ લાગવાનું વાસ્તવિક કારણ સ્પષ્ટ થઈ શક્યું નથી. પોલીસ અને ફાયર વિભાગ શોર્ટ સર્કિટ, આગ સલામતીના ધોરણોમાં સંભવિત બેદરકારી અને અન્ય કારણોને ધ્યાનમાં રાખીને તપાસ કરી રહ્યા છે.

હિન્દુસ્થાન સમાચાર / અમરેશ દ્વિવેદી

હિન્દુસ્થાન સમાચાર / ડો.હિતેશ એન.વ્યાસ