- શહેરથી સરહદી વિસ્તારો સુધી આગની ઘટનાઓએ ફાયર વિભાગની કસોટી કરી, 47 જવાનોની આખી રાતની દોડધામથી મોટી હોનારત ટળી, સદનસીબે કોઈ જાનહાનિ નહીં

કચ્છ, 10 નવેમ્બર (હિ.સ.) દિવાળીના તહેવાર દરમિયાન સમગ્ર શહેર દીવડાઓ અને આતશબાજીની રોશનીથી ઝગમગી રહ્યું હતું, ત્યારે બીજી તરફ આગની અણધારી ઘટનાઓએ ભુજ ફાયર વિભાગની કામગીરીને ભારે પડકાર આપ્યો હતો. દિવાળીની ઉજવણી દરમિયાન ભુજ ફાયર સ્ટેશનના કંટ્રોલ રૂમમાં શહેરના વિવિધ વિસ્તારોમાંથી એક પછી એક આગ લાગવાના કોલ આવતાં ફાયર વિભાગ આખી રાત દોડતું રહ્યું હતું. તહેવારના સમયગાળા દરમિયાન ઝાડી-ઝાંખરાં, ભંગારના વાડા અને વાહનોમાં આગ લાગવાની અલગ-અલગ ઘટનાઓ મળી કુલ 40 ફાયર કોલ નોંધાયા હતા.

ભુજ શહેરના અનેક વિસ્તારોમાં આગની ઘટનાઓ સામે આવી હતી. ગંગેશ્વર રોડ નજીક, હમીરસર તળાવના લેકવ્યૂ વિસ્તાર પાસે, ચંગલેશ્વર નજીક, મુન્દ્રા રોડ પર આવેલા 'ધ એડ્રેસ' બિલ્ડિંગ સામે તેમજ સંઘવી હોસ્પિટલ સામે ઝાડી-ઝાંખરાંમાં આગ લાગવાના બનાવો બન્યા હતા. આ ઉપરાંત નાગોર રોડ નજીક આવેલા ભંગારના વાડામાં આગ ભભૂકી ઊઠતાં ફાયર વિભાગે તાત્કાલિક દોડધામ કરવી પડી હતી. બીજી તરફ મિરજાપર ચાર રસ્તા નજીક વાહનોમાં આગ લાગવાની ઘટના પણ સામે આવી હતી. દિવાળીના ઉત્સવ વચ્ચે એક પછી એક વિસ્તારોમાંથી આગના કોલ મળતાં ફાયર વિભાગ માટે સતત સતર્ક રહેવું અનિવાર્ય બન્યું હતું.

આ તમામ ઘટનાઓ દરમિયાન ભુજ નગરપાલિકાના ફાયર વિભાગના કુલ 47 જવાનોનો સ્ટાફ આગ પર કાબૂ મેળવવા માટે સતત કાર્યરત રહ્યો હતો. શહેરના જુદા જુદા વિસ્તારોમાં એકસાથે કે ટૂંકા અંતરે સર્જાતી આગની પરિસ્થિતિને પહોંચી વળવા ફાયર કર્મચારીઓએ રાતભર ખડે પગે રહીને કામગીરી કરી હતી. આગ વધુ વિસ્તરે નહીં અને આસપાસના રહેણાક વિસ્તારો, મિલકતો કે અન્ય સ્થળોએ મોટું નુકસાન ન થાય તે માટે ફાયર ટીમે સમયસર પહોંચીને આગને કાબૂમાં લેવાના પ્રયાસો કર્યા હતા.

દિવાળીના તહેવાર દરમિયાન 40 જેટલા ફાયર કોલ મળવા એ ભુજ ફાયર વિભાગ માટે પડકારજનક સ્થિતિ હતી. જોકે, 47 જવાનોની સતત સતર્કતા અને રાતભરની કામગીરીને કારણે સંભવિત મોટી દુર્ઘટનાઓ ટળી હતી. સૌથી રાહતની બાબત એ રહી કે આગની આ તમામ ઘટનાઓમાં કોઈ વ્યક્તિનું મૃત્યુ કે જાનહાનિ થઈ નથી. તહેવારની ખુશીઓ વચ્ચે ભુજ ફાયર વિભાગના જવાનોની આ રાતભરની કામગીરી શહેરની સુરક્ષા માટેની તેમની જવાબદારી અને સેવાભાવનાનું ઉદાહરણ બની રહી હતી.

હિન્દુસ્થાન સમાચાર / Rohit Ramjibhai Padhiyar