-ટ્રાવેલરમાં 35 મુસાફરો સવાર હતા, જેમાંથી મોટાભાગના વિદ્યાર્થીઓ હોવાની માહિતી-ઘણા મુસાફરો વાહનમાં ફસાયા હોવાની આશંકા, રાહત અને બચાવ કામગીરી ચાલુ

ગોલાઘાટ (અસમ), નવી દિલ્હી, 13 નવેમ્બર. અસમના કાઝીરંગામાં શુક્રવારે થયેલા માર્ગ અકસ્માતમાં 10 થી વધુ લોકોના મોતની આશંકા વ્યક્ત કરવામાં આવી રહી છે. અકસ્માત તે સમયે થયો જ્યારે રંગાજાન પાસે એક મુસાફર ટ્રાવેલર અને કન્ટેનર ટ્રક વચ્ચે સામસામે જોરદાર ટક્કર થઈ. અકસ્માત બાદ ઘટનાસ્થળે નાસભાગ મચી ગઈ. દુર્ઘટનાગ્રસ્ત ટ્રાવેલરમાં અનેક મુસાફરો ફસાયા હોવાની આશંકા છે.

પ્રાથમિક માહિતી અનુસાર, ટ્રાવેલર (એએસ-02એસી-6690) બોકાખાતથી નગાંવ તરફ જઈ રહી હતી. આ દરમિયાન તેની કન્ટેનર ટ્રક (કેએ-01એટી-0977) સાથે ટક્કર થઈ ગઈ. જણાવવામાં આવ્યું છે કે ટ્રાવેલરમાં કુલ 35 મુસાફરો સવાર હતા, જેમાં મોટાભાગના વિદ્યાર્થીઓ હતા.

ટક્કર એટલી ભયાનક હતી કે, ટ્રાવેલર ખરાબ રીતે ક્ષતિગ્રસ્ત થઈ ગઈ. વાહનમાં ઘણા મુસાફરો ફસાયા હોવાની આશંકાને જોતા સ્થાનિક લોકો અને પોલીસકર્મીઓએ તાત્કાલિક રાહત અને બચાવ કામગીરી શરૂ કરી હતી. અકસ્માતના સ્થળે બચાવ કામગીરી ચાલુ છે.

અકસ્માતમાં ઘવાયેલા મુસાફરોને સારવાર માટે કોહોરા મોડેલ હોસ્પિટલમાં દાખલ કરવામાં આવ્યા છે. મૃતકોની સંખ્યા વધવાની આશંકા વ્યક્ત કરવામાં આવી રહી છે. જોકે, મૃતકો અને ઘાયલોની વાસ્તવિક સંખ્યાની સત્તાવાર પુષ્ટિ હજુ સુધી થઈ નથી.

પોલીસ અકસ્માતના કારણોની તપાસ કરવામાં લાગી છે. ઘટનાસ્થળે રાહત અને બચાવ કામગીરી ચાલુ છે. અકસ્માત અંગે વિસ્તૃત માહિતીની પ્રતીક્ષા છે.

હિન્દુસ્થાન સમાચાર / શ્રીપ્રકાશ / અરવિંદ રાય / ઉદય કુમાર સિંહ

હિન્દુસ્થાન સમાચાર / માધવી વ્યાસ