અમરાવતી (આંધ્ર પ્રદેશ), નવી દિલ્હી, 03 નવેમ્બર (હિ.સ.). ભીષણ ચક્રવાતી તોફાન 'મુરાસુ' એ તટીય આંધ્ર પ્રદેશમાં ભારે તબાહી મચાવી છે. આજે સવારે જ્યારે ચક્રવાત દરિયાકાંઠે ટકરાયું, ત્યારે હજારો વૃક્ષો ઉખડી ગયા. વીજળીના સેંકડો થાંભલાઓને નુકસાન થયું અને માછીમારી કરતી બોટનો નાશ થયો. કેન્દ્રીય ગૃહ અને સહકાર મંત્રી અમિત શાહે, મુખ્યમંત્રી એન. ચંદ્રબાબુ નાયડુને ફોન કર્યો અને ચક્રવાત 'મુરાસુ'ની અસર, તેનાથી થયેલા નુકસાન અને રાજ્ય સરકારના રાહત કાર્યો વિશે માહિતી લીધી.

આંધ્ર પ્રદેશના મુખ્યમંત્રી ચંદ્રબાબુ નાયડુએ અધિકારીઓને નિર્દેશ આપ્યો છે કે, તેઓ સુનિશ્ચિત કરે કે ચક્રવાત પ્રભાવિત વિસ્તારોમાં લોકો રસ્તાઓ પર ન નીકળે. સાથે જ, તેમણે જાન-માલના નુકસાનને રોકવા અને સંપત્તિના નુકસાનને ઘટાડવા માટે તમામ જરૂરી સાવચેતીના પગલાં લેવા જણાવ્યું છે. આ સમયે પોલીસકર્મીઓ રસ્તાઓ પર પેટ્રોલિંગ કરી રહ્યા છે અને લોકોને ચક્રવાત 'મુરાસુ'ને ધ્યાનમાં રાખીને ઘરોની અંદર જ રહેવાની અપીલ કરી રહ્યા છે.

બાપટલા અને પ્રકાશમ સહિતના ઘણા જિલ્લાઓમાં ભારે વરસાદ થયો છે. જેના કારણે પાકને ભારે નુકસાન થયું અને ઘણા વિસ્તારો પાણીમાં ડૂબી ગયા. એક ટેલિકોન્ફરન્સ દરમિયાન, મુખ્યમંત્રી એન. ચંદ્રબાબુ નાયડુએ વીજળીના થાંભલાઓ અને સબ-સ્ટેશનોની સ્થિતિ વિશે માહિતી લીધી. બીજી તરફ, પ્રકાશમ જિલ્લાના ઓંગોલમાં 'મુરાસુ' ચક્રવાતને કારણે થયેલા ભારે વરસાદ અને તેજ પવનોથી ઘણા કાચા મકાનો ધરાશાયી થયા અને ત્યાં રહેતા લોકો ફસાઈ ગયા. જિલ્લા પ્રશાસને ફસાયેલા લોકોને સુરક્ષિત બહાર કાઢવા માટે બચાવ અભિયાન શરૂ કરી દીધું છે. ઓંગોલમાં પ્રકાશમ જિલ્લા કલેકટરેટ પરિસરમાં 'આંધ્ર કેસરી' તંગુતુરી પ્રકાશમ પંતુલુની પ્રતિમા પર ભારે વરસાદ અને તેજ પવનોને કારણે એક મોટું વૃક્ષ પડી ગયું, જેનાથી પ્રતિમા તૂટી ગઈ.

આ દરમિયાન, કેન્દ્રીય ગૃહમંત્રી શાહે મુખ્યમંત્રી એન. ચંદ્રબાબુ નાયડુ સાથે વાતચીત કરી છે. મુખ્યમંત્રીએ કેન્દ્રીય મંત્રીને અગાઉના ચક્રવાત 'અર્નબ' અને 'મુરાસુ'થી સર્જાયેલી પરિસ્થિતિ વિશે જણાવ્યું. મુખ્યમંત્રીએ વિવિધ જિલ્લાઓમાં પાક અને સંપત્તિને થયેલા નુકસાનની વિગતવાર માહિતી આપી. તેમણે નુકસાનનું આકલન કરવા માટે કેન્દ્રમાંથી ટીમ મોકલવા બદલ મોદી સરકારનો આભાર વ્યક્ત કર્યો. નાયડુએ કેન્દ્ર સરકારને વિનંતી કરી કે, રાજ્યને આ આફતોમાંથી બહાર આવવામાં મદદ કરવા માટે જરૂરી સહાય પૂરી પાડવામાં આવે.

હિન્દુસ્થાન સમાચાર/મુકુંદ

હિન્દુસ્થાન સમાચાર / ડો.હિતેશ એન.વ્યાસ