ચેન્નઈ, નવી દિલ્હી, 04 નવેમ્બર (હિ.સ.). તમિલનાડુ વિધાનસભાની ખાલી પડેલી પાંચ બેઠકો પર ચૂંટણી કાર્યક્રમની જાહેરાત દિવાળી પછી થઈ શકે છે. આ બેઠકો અન્નાદ્રમુખ (એઆઈએડીએમકે) ધારાસભ્યોના રાજીનામાને કારણે ખાલી પડી છે. રાજ્યમાં એપ્રિલમાં થયેલી વિધાનસભા ચૂંટણીમાં ટીવીકે એ 108 બેઠકો પર જીત મેળવી અને કોંગ્રેસ, વીસીકે, મુસ્લિમ લીગ, ભારતીય કમ્યુનિસ્ટ પાર્ટી અને માર્ક્સવાદી કમ્યુનિસ્ટ પાર્ટીના સમર્થનથી ગઠબંધન સરકાર બનાવી છે.

સરકાર પાસે પર્યાપ્ત ધારાસભ્યોની સંખ્યા ન હોવાને કારણે, અન્નાદ્રમુખના ટિકિટ પર જીતેલા 25 ધારાસભ્યોએ પક્ષના નેતૃત્વના નિર્દેશોની અવહેલના કરીને ટીવીકે સરકારને સમર્થન આપ્યું. આનાથી અન્નાદ્રમુખની અંદર અસમંજસની સ્થિતિ ઊભી થઈ. પક્ષના કેટલાક ધારાસભ્યોએ રાજીનામું આપીને ટીવીકે માં જોડાઈ ગયા. આના કારણે સાત વિધાનસભા બેઠકો ખાલી પડી ગઈ. આમાંથી મદુરાંતકમ અને ધારાપુરમની 2 બેઠકો પર તાજેતરમાં પેટાચૂંટણીઓ થઈ ચૂકી છે. અન્નાદ્રમુખના ટિકિટ પર જીતેલા મરગદમ કુમારવેલ અને સત્યભામાએ પોતાની જૂની બેઠકો મદુરાંતકમ અને ધારાપુરમથી ટીવીકે ના ટિકિટ પર ચૂંટણી લડી અને જીત મેળવી.

આ સમયે ખાલી પડેલી પુદુકોટ્ટાઈ જિલ્લાની વિરાલીમલાઈ, કરૂર, તિરુનેલવેલી જિલ્લાની અંબાસમુદ્રમ, ઈરોડ જિલ્લાની પેરુન્દુરઈ અને મુખ્યમંત્રી વિજયના રાજીનામાથી ખાલી પડેલી તિરુચિ પૂર્વ વિધાનસભા બેઠક સહિત 5 બેઠકો સંબંધિત મામલામાં મદ્રાસ ઉચ્ચ ન્યાયાલયે પોતાનો ચુકાદો સુરક્ષિત રાખ્યો છે. આ મામલામાં જલ્દી જ ચુકાદો આવવાની અપેક્ષા વચ્ચે, ચૂંટણી પંચ આ પાંચ બેઠકો પર પેટાચૂંટણી કરાવવાની તૈયારી કરી રહ્યું છે.

હાલમાં મતદાર યાદીનું વિશેષ સંક્ષિપ્ત પુનરીક્ષણ કાર્ય ચાલી રહ્યું છે. આ પ્રક્રિયા ડિસેમ્બરમાં પૂરી થશે અને જાન્યુઆરીના પહેલા અઠવાડિયામાં અંતિમ મતદાર યાદી જાહેર કરવામાં આવશે. જણાવવામાં આવી રહ્યું છે કે, પેટાચૂંટણીની જાહેરાત થવા પર તેમાં કેટલાક ફેરફારો થઈ શકે છે. હાલમાં ચૂંટણી પંચે મતદાન કેન્દ્રોની નવી યાદી જાહેર કરી છે. તેમાં 56 નવા મતદાન કેન્દ્રો ઉમેરવામાં આવ્યા છે. ચૂંટણી પંચ સંબંધિત જિલ્લાઓના ચૂંટણી અધિકારીઓ સાથે વિચાર-વિમર્શ કરી રહ્યું છે.

જણાવવામાં આવી રહ્યું છે કે, મુખ્યમંત્રીના રાજીનામાથી ખાલી પડેલી તિરુચિ પૂર્વ વિધાનસભા બેઠકને છોડીને, બાકીની ચાર બેઠકો પર અન્નાદ્રમુખમાંથી ટીવીકે માં જોડાયેલા સી. વિજયભાસ્કર (વિરાલીમલાઈ), એમ.આર. વિજયભાસ્કર (કરૂર), ઈસાક્કી સુબ્બૈયા (અંબાસમુદ્રમ) અને જયકુમાર (પેરુન્દુરઈ) ને ફરીથી ઉમેદવાર બનાવી શકાય છે. પંચનો પ્રયાસ છે કે, આગામી 20 ડિસેમ્બર સુધીમાં પાંચેય વિધાનસભા બેઠકો પર પેટાચૂંટણીની પ્રક્રિયા પૂરી કરી લેવામાં આવે.

હિન્દુસ્થાન સમાચાર / વારા પ્રસાદ રાવ / મુકુંદ

હિન્દુસ્થાન સમાચાર / ડો.હિતેશ એન.વ્યાસ