ચેન્નઈ, નવી દિલ્હી, 06 નવેમ્બર (હિ.સ.) દીપાવલીના તહેવારને લઈને ચેન્નઈમાં રહેતા લોકો, પોતાના પૈતૃક ગામો અને શહેરો તરફ રવાના થવા લાગ્યા છે. આના કારણે શહેરના વિવિધ વિસ્તારોમાં ટ્રાફિકનું દબાણ વધી ગયું છે. મુસાફરોની વધતી સંખ્યાને ધ્યાનમાં રાખીને તમિલનાડુ રાજ્ય પરિવહન નિગમે વિશેષ બસોના સંચાલનની વ્યવસ્થા કરી છે. પરિવહન નિગમ અનુસાર, પાંચ નવેમ્બરના રોજ એક જ દિવસમાં 329 બસો દ્વારા લગભગ 1.40 લાખ મુસાફરોએ મુસાફરી કરી.
સામાન્ય રીતે સપ્તાહાંત, તહેવારો અને સતત રજાઓ દરમિયાન મુસાફરોની સુવિધા માટે પરિવહન નિગમ વિશેષ બસો ચલાવે છે. આ જ ક્રમમાં, વર્ષ 2026ના દીપાવલી પર્વ પર ચેન્નઈથી પોતાના પૈતૃક સ્થળો તરફ જનારા મુસાફરો માટે વ્યાપક વ્યવસ્થા કરવામાં આવી છે.
પરિવહન નિગમે પાંચથી સાત નવેમ્બર સુધી ચેન્નઈથી કુલ 15,659 બસો ચલાવવાની યોજના બનાવી છે. આમાં 6,573 નિયમિત અને 9,086 વિશેષ બસો શામેલ છે. વિશેષ બસોમાં 7,427 સરકારી તથા 1,659 ખાનગી કરારબદ્ધ બસો છે.
યોજના અનુસાર, પાંચ નવેમ્બરના રોજ 5,061 બસો ચલાવવાનું લક્ષ્ય રાખવામાં આવ્યું હતું. જ્યારે, છ નવેમ્બરના રોજ 2,191 નિયમિત અને 3,240 વિશેષ બસો સહિત કુલ 5,431 બસોનું સંચાલન કરવામાં આવી રહ્યું છે. સાત નવેમ્બરના રોજ 2,191 નિયમિત અને 2,976 વિશેષ બસો સહિત કુલ 5,167 બસો ચલાવવામાં આવશે.
મુસાફરોની સુવિધા માટે ચેન્નઈમાં પાંચ સ્થળોએથી વિશેષ બસો ચલાવવામાં આવી રહી છે. આમાં કિલામ્બક્કમ સ્થિત કલાઈગ્નર શતાબ્દી બસ ટર્મિનલ, કોઈમ્બેડુ સ્થિત પુરચ્ચિ થલાઈવર ડો. એમજીઆર બસ ટર્મિનસ, માધવરમ નવું બસ સ્ટેન્ડ, કિલામ્બક્કમમાં સીએમડીએ આબોહવા પાર્ક નજીક સ્થિત અસ્થાયી બસ સ્ટેન્ડ અને મરૈમલૈ નગરનું અસ્થાયી બસ સ્ટેન્ડ શામેલ છે.
પોંડીચેરી, કુડ્ડાલુર, ચિદમ્બરમ, તિરુચિ, મદુરાઈ, તુતીકોરિન, તિરુનેલવેલી, સાલેમ અને કોઈમ્બતુર સહિતના અન્ય સ્થળો માટે બસો કિલામ્બક્કમથી સંચાલિત કરવામાં આવી રહી છે. કુંભકોણમ, તંજાવુર અને નાગપટ્ટિનમ જતી બસો મરૈમલૈ નગરથી, જ્યારે વંદવાસી, પોલુર અને તિરુવન્નામલાઈ જતી બસો સીએમડીએના અસ્થાયી બસ સ્ટેન્ડથી ચલાવવામાં આવી રહી છે.
આ દરમિયાન, દીપાવલી ઉજવ્યા પછી પોતાના પૈતૃક સ્થળોએથી ચેન્નઈ પાછા ફરનારા મુસાફરોની સુવિધા માટે પણ સરકારે વિશેષ વ્યવસ્થા કરી છે. આ અંતર્ગત નવ અને 10 નવેમ્બરના રોજ કુલ 11,197 બસો ચલાવવાની યોજના બનાવવામાં આવી છે.
હિન્દુસ્થાન સમાચાર / ડો. વારા પ્રસાદ રાવ પીવી / ઉદય કુમાર સિંહ
હિન્દુસ્થાન સમાચાર / ડો.હિતેશ એન.વ્યાસ
