- અમરેલી જિલ્લા જેલમાંથી બંને આરોપીઓને ભચાઉ પોલીસે મેળવ્યા કબજામાં; ઘરફોડ ચોરીના ગુનામાં કાયદેસરની કાર્યવાહી હાથ ધરાઈ.

કચ્છ, 09 નવેમ્બર (હિ.સ.) : કચ્છ જિલ્લામાં ઘરફોડ ચોરી સહિતના મિલકત સંબંધી ગુનાઓને ડીટેક્ટ કરવા પોલીસ દ્વારા હાથ ધરવામાં આવી રહેલી કામગીરીના ભાગરૂપે ભચાઉ પોલીસે એક ઘરફોડ ચોરીના ગુનામાં સંડોવાયેલા બે આરોપીઓને ઝડપી પાડવાની કાર્યવાહી કરી છે. રાજકોટ અને સુરત જિલ્લાના રહેવાસી બંને શખ્સોને અન્ય ગુનામાં અમરેલી જિલ્લા જેલમાં બંધ હોવાના પગલે ટ્રાન્સફર વોરંટના આધારે તેમનો કબજો મેળવી ભચાઉ પોલીસ સ્ટેશન ખાતે નોંધાયેલા ગુનામાં આગળની કાયદેસરની કાર્યવાહી હાથ ધરવામાં આવી છે.

પોલીસ સૂત્રોના જણાવ્યા અનુસાર, ભચાઉ પોલીસ સ્ટેશનમાં વર્ષ 2026 દરમિયાન ઘરફોડ ચોરી અંગે ગુનો નોંધવામાં આવ્યો હતો. ગુનો નોંધાયા બાદ તેની તપાસ અને ભેદ ઉકેલવાની કામગીરી પોલીસ દ્વારા હાથ ધરવામાં આવી હતી. આ ગુનો અનડીટેક્ટ હોવાથી તેને ડીટેક્ટ કરવા અને તેમાં સંડોવાયેલા શખ્સો સુધી પહોંચવા પોલીસ સ્ટાફને જરૂરી સૂચનાઓ આપવામાં આવી હતી.

તપાસ દરમિયાન આ ગુનામાં સંડોવણી ધરાવતા હોવાની શંકા આધારે વિપુલ વલ્લભભાઈ કાવઠીયા અને મુકેશ કૌશીકભાઈ ઓગણીયા નામના બે શખ્સોની ઓળખ સામે આવી હતી. બંને આરોપીઓ અન્ય ગુનાના સંદર્ભમાં અમરેલી જિલ્લા જેલમાં બંધ હોવાનું જાણવા મળતાં ભચાઉ પોલીસે કાયદાકીય પ્રક્રિયા અનુસરી ટ્રાન્સફર વોરંટના આધારે તેમનો કબજો મેળવ્યો હતો.

પકડાયેલા આરોપીઓમાં પ્રથમ વિપુલ વલ્લભભાઈ કાવઠીયા (27)નો સમાવેશ થાય છે, જે રાજકોટ જિલ્લાના જેતપુર તાલુકાના દેરડીધાર વિસ્તારમાં આવેલી સરકારી આવાસ યોજનાના મકાન નંબર ૫૦૨માં રહે છે. જ્યારે બીજા આરોપી મુકેશ કૌશીકભાઈ ઓગણીયા (36) સુરત જિલ્લાના કામરેજ તાલુકાના વાવ ગામનો રહેવાસી છે

આ બંને આરોપીઓને ભચાઉ પોલીસ સ્ટેશનમાં તેમની સામે આગળની કાયદેસરની કાર્યવાહી હાથ ધરવામાં આવી છે. અન્ય જિલ્લામાં જેલમાં બંધ આરોપીઓ સુધી પહોંચી સ્થાનિક ગુનાની તપાસને આગળ વધારવાની ભચાઉ પોલીસની આ કામગીરી મહત્વપૂર્ણ બની છે. હવે આ ગુનાને લગતી વધુ વિગતો અને તપાસમાં બહાર આવતી હકીકતો પર સૌની નજર રહેશે.

---------------

હિન્દુસ્થાન સમાચાર / Rohit Ramjibhai Padhiyar