નવી દિલ્હી, 10 માર્ચ (હિ.સ.): મતદાર યાદીઓના ખાસ સઘન સુધારા (એસઆઈઆર) મુદ્દે, મંગળવારે રાજ્યસભામાં વિપક્ષે ભારે હોબાળો મચાવ્યો. શાસક પક્ષ અને વિપક્ષ વચ્ચે ઉગ્ર બોલાચાલી થઈ, જેના કારણે વોકઆઉટ થયું. રાજ્યસભા સવારે 11 વાગ્યે મળી કે તરત જ જરૂરી દસ્તાવેજો અને અહેવાલો ટેબલ પર મૂકવામાં આવ્યા. શૂન્ય કલાક શરૂ થતાં જ વિપક્ષે એસઆઈઆર મુદ્દા પર ચર્ચાની માંગ કરી. રાજ્યસભામાં વિપક્ષના નેતા મલ્લિકાર્જુન ખડગેએ અનેક રાજ્યોમાં ચાલી રહેલા એસઆઈઆર અંગે પ્રશ્નો ઉઠાવ્યા. આ પ્રક્રિયાને છેતરપિંડી ગણાવતા ખડગેએ કહ્યું કે, તે મતદાર યાદીઓની વિશ્વસનીયતા પર પ્રશ્નો ઉભા કરી રહી છે અને ઘણા કાયદેસર મતદારોના નામ દૂર કરવામાં આવી રહ્યા છે. તેમણે સરકારને સ્પષ્ટતા પ્રદાન કરવા અને પ્રક્રિયા પર ચર્ચા કરવાની માંગ કરી.

ગૃહના નેતા જે.પી. નડ્ડાએ વિપક્ષના આરોપોને ફગાવી દીધા અને કહ્યું કે, અગાઉના સત્રમાં ચૂંટણી સુધારાઓ પર વિગતવાર ચર્ચા થઈ ચૂકી છે. તેમણે વિપક્ષ પર સંસદની કાર્યવાહીમાં ખલેલ પહોંચાડવાનો આરોપ લગાવ્યો અને કહ્યું કે, વારંવાર આવા મુદ્દાઓ ઉઠાવવા યોગ્ય નથી. વિપક્ષ ગૃહની અંદર વાસ્તવિક ચર્ચા ઇચ્છતો નથી અને વારંવાર હોબાળો કરીને કાર્યવાહીમાં ખલેલ પહોંચાડે છે. નડ્ડાએ વિપક્ષના વોકઆઉટની ટીકા કરતા કહ્યું કે, ગૃહમાંથી વોકઆઉટ કરીને વિપક્ષે ફરી એકવાર દર્શાવ્યું છે કે તેઓ અર્થપૂર્ણ ચર્ચા ઇચ્છતા નથી. વિપક્ષનું વલણ બેજવાબદાર છે. તેઓ અરાજકતામાં માને છે. સંસદ મુદ્દાઓ પર ચર્ચા માટે પૂરતી તક પૂરી પાડે છે, પરંતુ ચર્ચાને બદલે વિપક્ષ વિરોધ અને વોકઆઉટનો માર્ગ પસંદ કરી રહ્યો છે.

હિન્દુસ્થાન સમાચાર / વિજયાલક્ષ્મી / પવન કુમાર

હિન્દુસ્થાન સમાચાર / માધવી વ્યાસ