નવી દિલ્હી, 24 માર્ચ (હિ.સ.): ભારતીય ચૂંટણી પંચ (ઈસીઆઈ) એ, આગામી વિધાનસભા ચૂંટણીઓ અને પેટાચૂંટણીઓ માટે તેની તૈયારીઓને અંતિમ સ્વરૂપ આપવાનું શરૂ કરી દીધું છે. મંગળવારે નવી દિલ્હીમાં તેના મુખ્યાલય ખાતે, મુખ્ય ચૂંટણી કમિશનર (સીઈસી) જ્ઞાનેશ કુમારની અધ્યક્ષતામાં એક ઉચ્ચ સ્તરીય સમીક્ષા બેઠક યોજાઈ હતી, જેમાં આંતર-રાજ્ય સરહદી સુરક્ષા અને ચૂંટણી અખંડિતતા પર ખાસ ભાર મૂકવામાં આવ્યો હતો. બેઠકમાં ચૂંટણી કમિશનર ડૉ. એસ.એસ. સંધુ અને ડૉ. વિવેક જોશી પણ હાજર રહ્યા હતા.

ચૂંટણી પંચે આસામ, કેરળ, પોંડીચેરી, તમિલનાડુ અને પશ્ચિમ બંગાળમાં આગામી સામાન્ય ચૂંટણીઓ તેમજ છ અન્ય રાજ્યોમાં પેટાચૂંટણીઓ અંગેની પરિસ્થિતિની સમીક્ષા કરી હતી. આ બેઠકમાં આ પાંચ ચૂંટણી રાજ્યો અને તેમના 12 પડોશી રાજ્યોના મુખ્ય સચિવો, પોલીસ મહાનિર્દેશકો (ડીજીપી) અને મુખ્ય ચૂંટણી અધિકારીઓ (સીઈઓ) હાજર રહ્યા હતા.

ચૂંટણી પંચે આગામી વિધાનસભા ચૂંટણીઓ અને પેટાચૂંટણીઓ માટે તૈયારીઓ શરૂ કરી દીધી છે. ગેરકાયદેસર રોકડ, દારૂ, માદક દ્રવ્યો અને શસ્ત્રોની દાણચોરી અટકાવવા માટે અમલીકરણ એજન્સીઓને પણ સતર્ક રાખવામાં આવી છે. ચૂંટણીવાળા રાજ્યો અને તેમના પડોશી રાજ્યો વચ્ચે વધુ સારા સંકલન સુનિશ્ચિત કરવા માટે અધિકારીઓને એકબીજા સાથે માહિતી શેર કરવા કહેવામાં આવ્યું છે.

આ બેઠકમાં સીબીડીટી, ઈડી, એનસીબી, ડીઆરઆઈ જેવી મુખ્ય તપાસ એજન્સીઓ તેમજ સીઆરપીએફ, બીએસએફ અને આઈટીબીપી જેવા અર્ધલશ્કરી દળોના વડાઓએ હાજરી આપી હતી. કમિશને આ એજન્સીઓને ખર્ચ-સંવેદનશીલ મતવિસ્તારો પર કડક નજર રાખવા, મજબૂત ગુપ્ત માહિતીના આધારે દરોડા અને જપ્તી તીવ્ર બનાવવા અને એરપોર્ટ, બંદરો અને પોસ્ટલ સેવાઓ દ્વારા કોઈપણ શંકાસ્પદ પ્રવૃત્તિની તપાસ કરવાનો નિર્દેશ આપ્યો છે. આ બેઠકનો ઉદ્દેશ્ય આ ચૂંટણીઓ સંપૂર્ણપણે હિંસામુક્ત, ધાકધમકીમુક્ત અને પ્રલોભનમુક્ત થાય તેની ખાતરી કરવાનો છે.

હિન્દુસ્થાન સમાચાર / શ્રદ્ધા દ્વિવેદી / જીતેન્દ્ર તિવારી

હિન્દુસ્થાન સમાચાર / માધવી વ્યાસ