મહેસાણા, 24 માર્ચ (હિ.સ.) એશિયાના સૌથી મોટા ગણાતા ઊંઝા માર્કેટિંગ યાર્ડ (APMC)ને લઈને મહત્વપૂર્ણ નિર્ણય લેવાયો છે. માર્ચ મહિનાના અંતે હિસાબી કામગીરી પૂર્ણ કરવા માટે યાર્ડમાં 25 માર્ચથી 1 એપ્રિલ સુધી હરાજીનું કામકાજ સંપૂર્ણપણે બંધ રાખવામાં આવશે.
દર વર્ષે નાણાકીય વર્ષના અંતે વેપારીઓ અને વહીવટી તંત્ર દ્વારા હિસાબોના મેળવણા કરવામાં આવતા હોય છે. આ પરંપરા મુજબ આ વર્ષે પણ સળંગ 8 દિવસ સુધી યાર્ડમાં તમામ પ્રકારની જણસીઓની હરાજી પ્રક્રિયા સ્થગિત રાખવાનો નિર્ણય લેવામાં આવ્યો છે. આ દરમિયાન કોઈપણ પ્રકારની ખરીદી-વેચાણની કામગીરી હાથ ધરાશે નહીં.
ઊંઝા APMCના ચેરમેનએ જણાવ્યું હતું કે, હિસાબી પ્રક્રિયા સુચારુ રીતે પૂર્ણ થાય તે માટે આ વિરામ આવશ્યક છે. તેમણે વધુમાં ઉમેર્યું કે, 2 એપ્રિલથી યાર્ડમાં હરાજીનું કામકાજ ફરી રાબેતા મુજબ શરૂ કરવામાં આવશે.
યાર્ડ સંચાલન દ્વારા ખેડૂતોને અપીલ કરવામાં આવી છે કે, તેઓ આ સમયગાળા દરમિયાન પોતાની ખેતી ઉપજ વેચાણ માટે યાર્ડમાં ન લાવે. વેપારી વર્તુળો મુજબ, વર્ષાંતની આ પ્રક્રિયા વ્યવસ્થિત રીતે પૂર્ણ કરવા માટે હરાજી બંધ રાખવાનો નિર્ણય જરૂરી માનવામાં આવે છે.
---------------
હિન્દુસ્થાન સમાચાર / RINKU AMITKUMAR THAKOR
