ગીર સોમનાથ, 18 એપ્રિલ (હિ.સ.)

ગીર સોમનાથ જિલ્લાના સુત્રાપાડા તાલુકામાં આવનારી સ્થાનિક સ્વરાજની ચૂંટણીને લઈને ચૂંટણી તંત્ર દ્વારા ઇવીએમ મશીનોની પ્રિપેરેશન કામગીરી શરૂ કરવામાં આવી છે.

ચૂંટણી પ્રક્રિયામાં પારદર્શિતા અને વિશ્વસનીયતા જળવાઈ રહે તે હેતુસર જિલ્લા પંચાયત અને તાલુકા પંચાયતના તમામ ઉમેદવારોને ચૂંટણી અધિકારીઓ દ્વારા લેખિતમાં જાણ કરવામાં આવી હતી. સૂચના મુજબ તમામ પક્ષોના ઉમેદવારોને નિર્ધારિત સ્થળે હાજર રહેવા આમંત્રણ આપવામાં આવ્યું હતું.

ઉમેદવારોની હાજરીમાં ચૂંટણી અધિકારીઓ દ્વારા ઇવીએમ મશીનોની પ્રિપેરેશન પ્રક્રિયા કરવામાં આવી હતી. આ દરમિયાન મશીનોની ચકાસણી, સેટિંગ તેમજ જરૂરી તકનિકી પ્રક્રિયાઓ પૂર્ણ કરવામાં આવી હતી, જેથી ચૂંટણી દિવસ દરમિયાન કોઈ પ્રકારની અડચણ ન સર્જાય.

આ પ્રક્રિયામાં જિલ્લા પંચાયત અને તાલુકા પંચાયતના વિવિધ રાજકીય પક્ષોના ઉમેદવારો હાજર રહ્યા હતા અને સમગ્ર કામગીરીને નજીકથી નિરીક્ષણ કર્યું હતું. ચૂંટણી તંત્ર દ્વારા તમામ પ્રક્રિયા પારદર્શક રીતે કરવામાં આવી હોવાનો વિશ્વાસ વ્યક્ત કરવામાં આવ્યો હતો.

ચૂંટણી અધિકારીઓએ જણાવ્યું હતું કે, સ્વચ્છ, નિષ્પક્ષ અને સુવ્યવસ્થિત ચૂંટણી યોજાય તે માટે તમામ જરૂરી તૈયારીઓ પૂર્ણ કરી લેવામાં આવી રહી છે.

આમ, ઉમેદવારોની હાજરીમાં ઇવીએમ મશીનોની પ્રિપેરેશન કામગીરી સફળતાપૂર્વક પૂર્ણ થતાં ચૂંટણી પ્રક્રિયા પ્રત્યે વિશ્વાસ વધુ મજબૂત બન્યો છે.

---------------

હિન્દુસ્થાન સમાચાર / ભરતસિંહ જાદવ