સેલવાસ, 21 એપ્રિલ (હિ.સ.) દાદરા અને નગર હવેલીના ચર્ચિત આરટીઓ લાંચ કાંડમાં સેન્ટ્રલ બ્યુરો ઓફ ઈન્વેસ્ટિગેશન (સીબીઆઈ) દ્વારા ચાલી રહેલી તપાસમાં સોમવારે મહત્વપૂર્ણ વળાંક આવ્યો છે. મુખ્ય આરોપી અને આરટીઓ અધિકારી બિપિન પવારની પાંચ દિવસની સીબીઆઈ કસ્ટડી પૂર્ણ થતાં તેમને કોર્ટમાં રજૂ કરવામાં આવ્યા હતા, જ્યાંથી કોર્ટે તેમને જ્યુડિશિયલ કસ્ટડીમાં જેલ હવાલે કરવાનો આદેશ કર્યો હતો.

આ કેસના સહ-આરોપી મુકુંદ કોકાની પહેલાથી જ ન્યાયિક હિરાસતમાં છે અને હાલ બંને આરોપીઓ જેલમાં રાખવામાં આવ્યા છે. સીબીઆઈએ તપાસ દરમિયાન બંને વચ્ચેના સંભવિત સંબંધો અને લાંચની રકમના લેવડદેવડ અંગે મહત્વપૂર્ણ પુરાવાઓ એકત્ર કર્યા હોવાનું જાણવા મળે છે.

રિમાન્ડ દરમિયાન સીબીઆઈએ બિપિન પવારની સઘન પૂછપરછ કરી હતી, જેમાંથી નાણાકીય વ્યવહારો સંબંધિત મહત્વના દસ્તાવેજો એજન્સીના હાથે લાગ્યા હોવાનું સૂત્રો દ્વારા જાણવા મળ્યું છે. આ દસ્તાવેજોના આધારે કેસમાં વધુ ખુલાસા થવાની શક્યતા વ્યક્ત કરવામાં આવી રહી છે.

સેલવાસ ડિસ્ટ્રિક્ટ એન્ડ સેસન્સ કોર્ટે કેસની ગંભીરતા ધ્યાનમાં રાખીને બંને આરોપીઓને જામીન આપવાને બદલે જ્યુડિશિયલ કસ્ટડીમાં જ રાખવાનો નિર્ણય કર્યો છે.

સીબીઆઈ હવે આગળની તપાસમાં અન્ય સંડોવાયેલા લોકો સુધી પહોંચવા માટે નાણાકીય વ્યવહારોની કડીઓ તપાસી રહી છે. આ કેસમાં આવનારા દિવસોમાં વધુ ખુલાસા થવાની સંભાવના વ્યક્ત કરવામાં આવી રહી છે.

---------------

હિન્દુસ્થાન સમાચાર / Krishna Ghanshyam Jha