વોશિંગ્ટન, નવી દિલ્હી, 01 મે (હિ.સ.). અમેરિકાના રાષ્ટ્રપતિ ડોનાલ્ડ ટ્રમ્પે, વોશિંગ્ટન અને તેહરાન વચ્ચે વધેલા તણાવની વચ્ચે ગુરુવારે જણાવ્યું હતું કે જો ઈરાનને શાંતિ જોઈતી હોય, તો તેણે ક્યારેય પરમાણુ હથિયાર ન રાખવાની ગેરંટી આપવી પડશે. તેમણે કહ્યું કે, જો અમેરિકા આજે ઈરાન છોડી દે, તો પણ તેને ફરીથી બેઠા થવામાં 20 વર્ષનો સમય લાગી જશે. રાષ્ટ્રપતિ ટ્રમ્પે ફરીથી દાવો કર્યો કે ઈરાનમાં યુદ્ધ અમેરિકા પહેલેથી જ જીતી ચૂક્યું છે. પરંતુ આ જીત બહુ નાની છે. અમેરિકાને વધુ મોટી જીત જોઈએ છે. ટ્રમ્પે કહ્યું કે, ઈરાનની નૌકાદળ અને વાયુસેનાની સાથે તેનું નેતૃત્વ પણ તબાહ થઈ ગયું છે.

સીબીએસ ન્યૂઝના રિપોર્ટ અનુસાર, ટ્રમ્પે કહ્યું, અમે બધું જ તબાહ કરી દીધું છે. જો અમે અત્યારે ત્યાંથી હટી જઈએ તો તેમને ફરીથી બધું ઉભું કરવામાં 20 વર્ષ લાગશે. એમાં શંકા છે કે તેઓ તેમ કરી શકશે. અમેરિકા હજુ ઘણું બધું કરવા માંગે છે. ટ્રમ્પે કહ્યું, ઈરાને આ ગેરંટી આપવી પડશે કે તેની પાસે ક્યારેય કોઈ પરમાણુ હથિયાર નહીં હોય. ટ્રમ્પે ફરીથી મક્કમતાથી કહ્યું કે ઈરાન સમજૂતી કરવા માટે તત્કાળ તૈયાર છે. તેમણે એ વાતને નકારી કાઢી કે ઈરાન સાથેની વાતચીત અટકી ગઈ છે. ટ્રમ્પે કહ્યું, મારા અને કેટલાક અન્ય લોકો સિવાય કોઈ જાણતું નથી કે વાતચીત કયા તબક્કે છે. ટ્રમ્પે પુનરોચ્ચાર કર્યો કે અમેરિકાને કોઈપણ સંજોગોમાં ઈરાનનો સંવર્ધિત યુરેનિયમનો ભંડાર જોઈએ છે.

તેમણે કહ્યું કે, યુદ્ધ ખતમ થવાની સાથે જ ગેસના ભાવ ઝડપથી નીચે પડી જશે. બીજી તરફ, ટ્રેઝરી સેક્રેટરી સ્કોટ બેસેન્ટે કહ્યું કે, ઈરાનનું ચલણ અત્યાર સુધીના સૌથી નીચલા સ્તરે પહોંચી ગયું છે. ઉલ્લેખનીય છે કે અત્યારે ઈરાન અને અમેરિકા વચ્ચે તણાવ અત્યંત નાજુક તબક્કે છે. યુદ્ધની આશંકા વચ્ચે શાંતિના પ્રયાસો પણ ચાલુ છે. ઈરાને હાલમાં જ અમેરિકા સામે શરતી પ્રસ્તાવ રજૂ કર્યો છે. જેમાં હોર્મુઝની સામુદ્રધુની ખોલવા અને પરમાણુ વાટાઘાટોને હાલ પૂરતી મુલતવી રાખવાની વાત કહેવામાં આવી છે. 28 ફેબ્રુઆરીએ અમેરિકા અને ઈઝરાયેલ દ્વારા ઈરાન વિરુદ્ધ શરૂ કરવામાં આવેલા સંકલિત સૈન્ય અભિયાનની અસર સમગ્ર મધ્ય પૂર્વ પર પડી છે.

અમેરિકાના રાષ્ટ્રપતિ ડોનાલ્ડ ટ્રમ્પે આ પ્રસ્તાવ પર શંકા વ્યક્ત કરી છે. તેઓ પરમાણુ સંવર્ધનના મુદ્દાને બાજુ પર રાખવામાં આવતા નાખુશ છે. વ્યૂહાત્મક રીતે મહત્વપૂર્ણ એવા આ જળમાર્ગને લઈને સ્થિતિ તણાવપૂર્ણ બનેલી છે. ઈરાને તેને વેપાર માટે બંધ કરવાની ધમકી આપી છે. તે કથિત રીતે સુરંગ બિછાવી રહ્યું છે.

ભારત માટે રાહતની વાત એ છે કે, ઈરાને ભારતીય જહાજોના ત્યાંથી પસાર થવા પર રોક નહીં લગાવવાનું આશ્વાસન આપ્યું છે. આ બધાની વચ્ચે રશિયાના રાષ્ટ્રપતિ વ્લાદિમીર પુતિન આ સંઘર્ષમાં શાંતિ દૂતની ભૂમિકામાં જોવા મળી રહ્યા છે. ઈરાન રશિયા સાથે મળીને અમેરિકા વિરુદ્ધ વ્યૂહાત્મક ચક્રવ્યૂહ રચવાનો પ્રયાસ પણ કરી ચૂક્યું છે.

ઈરાન સાથેના યુદ્ધને લઈને અમેરિકાની અંદર પણ મંતવ્યો વહેંચાયેલા છે. રાષ્ટ્રપતિ ટ્રમ્પ અને તેમના વહીવટીતંત્રના કેટલાક સભ્યો સૈન્ય કાર્યવાહીની તરફેણમાં છે, જ્યારે ઉપરાષ્ટ્રપતિ જેડી વેન્સ અને અનેક ડેમોક્રેટ્સ સંસાધનોના બગાડ અને સંભવિત પરિણામોને લઈને ચિંતિત છે. એવું કહેવામાં આવી રહ્યું છે કે અમેરિકા આ સંઘર્ષમાં અત્યાર સુધીમાં લગભગ 25 અબજ ડોલર ખર્ચ કરી ચૂક્યું છે. બીજી તરફ, ઈરાન સૈન્ય તૈયારીમાં વ્યસ્ત છે. તેહરાનમાં હાલમાં જ ઈસ્લામિક રિવોલ્યુશનરી ગાર્ડ કોર્પ્સે પોતાના અર્શ ડ્રોનના અદ્યતન સંસ્કરણનું પ્રદર્શન કર્યું છે.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ