મેડ્રિડ, નવી દિલ્હી, 02 મે (હિ.સ.): મેડ્રિડ ઓપનમાં વિશ્વના નંબર-3 ખેલાડી એલેક્ઝાન્ડર જ્વેરેવે શુક્રવારની રાત્રે શાનદાર પ્રદર્શન કરતા બેલ્જિયમના ઉભરતા ખેલાડી એલેક્ઝાન્ડર બ્લોક્સને સીધા સેટમાં 6-2, 7-5 થી હરાવીને ફાઇનલમાં પ્રવેશ મેળવી લીધો છે. હવે ખિતાબી મુકાબલામાં તેમનો સામનો વિશ્વના નંબર-1 ખેલાડી જાનિક સિનર સાથે થશે.

મેચ બાદ જ્વેરેવે કહ્યું, “ફાઇનલમાં પહોંચીને હું ખૂબ જ ખુશ છું. અહીં ઘણા કઠિન મુકાબલા અને સંઘર્ષ જોવા મળ્યા. હું જાનિક સિનર વિરુદ્ધ ફરીથી રમવા માટે ઉત્સાહિત છું. આ સમયે તેમના માટે ટેનિસ રમવું ખૂબ જ સરળ લાગી રહ્યું છે, પરંતુ આશા છે કે ફાઇનલમાં હું તેમને જોરદાર ટક્કર આપીશ.”

જ્વેરેવે મુકાબલાની શરૂઆતથી જ દબદબો જાળવી રાખ્યો અને પ્રથમ સેટમાં પ્રથમ અને પાંચમી ગેમમાં બ્રેક મેળવીને 5-1 ની સરસાઈ મેળવી લીધી. જોકે બ્લોક્સે સંઘર્ષ દર્શાવતા કેટલાક સેટ પોઈન્ટ બચાવ્યા હતા, પરંતુ જર્મન ખેલાડીએ ચોથા પ્રયત્ને સેટ પોતાના નામે કરી લીધો હતો.

બીજા સેટમાં બ્લોક્સે કડી ટક્કર આપી અને અનેક બ્રેક પોઈન્ટ બચાવ્યા, પરંતુ અંતે જ્વેરેવે 6-5 ની સરસાઈ મેળવી નિર્ણાયક બ્રેક હાંસલ કર્યો અને મેચ જીતી લીધી.

આ જીતની સાથે જ્વેરેવ આ સિઝનમાં પ્રથમ વખત ફાઇનલમાં પહોંચ્યા છે. તેઓ આ પહેલા 2018 અને 2021 માં મેડ્રિડ ઓપનનો ખિતાબ જીતી ચૂક્યા છે અને હવે ત્રીજી વખત ટ્રોફી જીતવાના ઈરાદા સાથે મેદાનમાં ઉતરશે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ