- પ્રશાંત એગ્રીકમાંથી 4 લાખથી વધુનો મુદ્દામાલ જપ્ત કરવામાં આવ્યો

- યુપીએલ કંપનીના કન્ટેન ધરાવતી દવાઓ સહિત અન્ય કંપનીઓની ખેતી વપરાશની દવાઓ ડુપ્લીકેટ બનતી

- સમગ્ર મામલે પાનોલી પોલીસે કંપની સામે કોપીરાઇટ એક્ટ હેઠળ ગુનો નોંધી વધુ તપાસ હાથ ધરી છે

ભરૂચ, 21 મે (હિ.સ.) : ભરૂચ જિલ્લાના પાનોલી જીઆઈડીસી વિસ્તારમાં આવેલી એક ગુપ્ત ફેક્ટરી પર પોલીસે બાતમીના આધારે દરોડો પાડીને મોટા પાયે ચાલતા નકલી (ડુપ્લીકેટ) ખેતીવાડીની દવાઓ બનાવવાના કૌભાંડનો પર્દાફાશ કર્યો છે. આ દરોડા દરમિયાન જાણીતી એગ્રો-કેમિકલ કંપની 'યુપીએલ' (UPL) ના ટ્રેડમાર્ક અને કન્ટેનરનો ગેરકાયદેસર ઉપયોગ કરીને પેક કરવામાં આવેલો રૂપિયા 4 લાખથી વધુની કિંમતનો મુદ્દામાલ જપ્ત કરવામાં આવ્યો છે. આ ઘટનાને પગલે સમગ્ર પંથકના ખેડૂતો અને કૃષિ ક્ષેત્રના વેપારીઓમાં ભારે ચકચાર મચી ગઈ છે.

જાણીતી બ્રાન્ડ 'યુપીએલ'ના નામે ચાલતું હતું નેટવર્ક

પોલીસ સૂત્રો પાસેથી મળતી માહિતી અનુસાર, પાનોલી પોલીસને ચોક્કસ બાતમી મળી હતી કે એક કારખાનામાં ખેડૂતો સાથે છેતરપિંડી કરવાના આશયથી બજારમાં પ્રતિષ્ઠિત એવી યુપીએલ કંપનીના નામે નકલી જંતુનાશક દવાઓ તૈયાર થઈ રહી છે. પોલીસે ત્વરિત કાર્યવાહી કરીને ફેક્ટરી પર રેડ પાડી હતી. દરોડા દરમિયાન સ્થળ પરથી યુપીએલ કંપનીના લોગો અને કન્ટેનર ધરાવતી નકલી દવાઓ, પેકિંગ મટિરિયલ અને કેમિકલનો મોટો જથ્થો મળી આવ્યો હતો, જેની અંદાજિત કિંમત 4 લાખથી વધુ આંકવામાં આવી રહી છે.

કોપીરાઇટ એક્ટ હેઠળ ગુનો દાખલ કરવામાં આવ્યો. આ સમગ્ર મામલે પાનોલી પોલીસે ગુનો નોંધી કાયદેસરની કાર્યવાહી હાથ ધરી છે. ફેક્ટરીના સંચાલકો સામે કોપીરાઇટ એક્ટ તેમજ છેતરપિંડીની વિવિધ કલમો હેઠળ ગુનો નોંધી વધુ તપાસ હાથ ધરવામાં આવી છે.

હાલ પ્રાથમિક ગુનો નોંધી મુદ્દામાલ કબજે કરાયો છે. આ ડુપ્લીકેટ દવાઓના ઉત્પાદન અને વેચાણ પાછળ રાજ્યવ્યાપી કે આંતરરાજ્ય કોઈ મોટું નેટવર્ક કે સિંડિકેટ સંકળાયેલું છે કે નહીં, તે દિશામાં પણ ઊંડાણપૂર્વકની તપાસ શરૂ કરવામાં આવી છે. ટૂંક સમયમાં જ મુખ્ય સૂત્રધારોની ધરપકડ કરવામાં આવશે.

ચોમાસાની આગામી સિઝન પૂર્વે જ આ પ્રકારે નકલી દવાઓ બનાવતી ફેક્ટરી ઝડપાતા કૃષિ ક્ષેત્ર સાથે સંકળાયેલા સ્થાનિક વેપારીઓ અને જગતના તાત ખેડૂતોમાં ઘેરી ચિંતા વ્યાપી ગઈ છે. નકલી દવાઓના કારણે પાકને મોટું નુકસાન થવાની ભીતિ સેવાતી હોય છે, જેને પગલે ખેડૂત સંગઠનો દ્વારા આવા તત્વો સામે કડકમાં કડક પગલાં ભરવાની માંગ કરવામાં આવી રહી છે.

---------------

હિન્દુસ્થાન સમાચાર / અતુલકુમાર પટેલ