આગ્રા, નવી દિલ્હી, 25 મે (હિ.સ.) ચાર દિવસીય ભારત પ્રવાસ પર આવેલા અમેરિકી વિદેશ મંત્રી માર્કો રુબિયો, પોતાના પૂર્વ પ્રસ્તાવિત કાર્યક્રમ અનુસાર સોમવારે વિશેષ વિમાન દ્વારા આગ્રા પહોંચ્યા અને પત્ની સાથે તાજમહેલની સુંદરતા નિહાળી.

અમેરિકી વિદેશ મંત્રી માર્કો રુબિયો શનિવારથી ભારત પ્રવાસે છે. આ દરમિયાન તેઓ સોમવારે પોતાની પત્ની જીનેટ રુબિયો સાથે વિશેષ વિમાન દ્વારા આગ્રામાં વાયુસેનાના ખેરિયા હવાઈ મથકે સવારે આશરે 9:30 વાગ્યે પહોંચ્યા. ત્યાંથી તેમનો કાફલો સીધો તાજમહેલના શિલ્પગ્રામ પહોંચ્યો. માર્કો અને તેમના પત્ની એક ગોલ્ફ કાર્ટમાં બેસીને તાજમહેલના પૂર્વી ગેટ પર પહોંચ્યા અને ચાલીને પૂર્વી ગેટથી તાજમહેલ પરિસરમાં પ્રવેશ કર્યો. તેમની સાથે પ્રતિનિધિમંડળના કેટલાક સભ્યો પણ હતા.

તાજમહેલની સુંદરતાથી મંત્રમુગ્ધ થયેલા માર્કો રુબિયોએ, પોતાની પત્ની જીનેટ સાથે ડાયના બેન્ચ પર આ સુંદર પળોને ફોટોગ્રાફીના માધ્યમથી કેદ કરી. માર્ગદર્શક નીતિન ગુપ્તાએ માર્કો રુબિયો સાથે રહીને તાજમહેલની મુલાકાત કરાવી અને તાજમહેલના નિર્માણ તેમજ તેના ઇતિહાસ અંગે માહિતી આપી.

માર્કો રુબિયો તાજમહેલ જોયા બાદ આગ્રાની એક પાંચ સિતારા હોટેલમાં અલ્પ વિશ્રામ અને બપોરના ભોજન માટે રવાના થયા. ત્યારબાદ તેઓ આગ્રાથી જયપુર માટે રવાના થશે. મળતી માહિતી મુજબ, હોટેલથી માર્કો રુબિયો પોતાના કાફલા સાથે આશરે 12:30 વાગ્યે ખેરિયા હવાઈ મથકે પહોંચશે અને જયપુર માટે બપોરે 1:00 વાગ્યે ઉડાન ભરશે.

અમેરિકી વિદેશ મંત્રીના આગ્રા પ્રવાસ દરમિયાન અમેરિકી સુરક્ષા ટીમની સાથે-સાથે આગ્રા પોલીસ અને વહીવટીતંત્ર દ્વારા સુરક્ષાની પૂરતી વ્યવસ્થા કરવામાં આવી હતી. ગુપ્તચર એજન્સીઓ પણ સતર્ક છે. ખેરિયા હવાઈ મથકથી લઈને તાજમહેલ સુધી તેમજ તાજમહેલથી હોટેલ અમર વિલાસ સુધી ચપ્પે-ચપ્પે પોલીસ તૈનાત કરવામાં આવી છે.

હિન્દુસ્થાન સમાચાર / વિવેક ઉપાધ્યાય / દિલીપ શુક્લા / ડૉ. રાજેશ

હિન્દુસ્થાન સમાચાર / ડો.હિતેશ એન.વ્યાસ