નવી દિલ્હી, 28 મે (હિ.સ.). કેન્દ્રીય કૃષિ અને ખેડૂત કલ્યાણ મંત્રી શિવરાજ સિંહ ચૌહાણે ગુરુવારે જણાવ્યું હતું કે, વર્ષ 2025-26માં દેશનું કુલ અંદાજિત અનાજ ઉત્પાદન 3,765.63 લાખ ટન સુધી પહોંચી ગયું છે, જે ગત વર્ષની સરખામણીમાં આશરે 188 લાખ ટન વધુ છે. બીજી તરફ, ચોખાના ઉત્પાદનમાં ભારતે નવો કીર્તિમાન સ્થાપિત કર્યો છે. તેમણે જણાવ્યું હતું કે, ચોખાનું ઉત્પાદન 1,540.24 લાખ ટન સુધી પહોંચી ગયું છે અને ચીનને પછાડીને હવે ભારત વિશ્વમાં નંબર વન બની ગયું છે. તેમણે માહિતી આપી હતી કે, ઘઉંનું ઉત્પાદન 1,206.57 લાખ ટન અને મકાઈનું ઉત્પાદન 550.92 લાખ ટન નોંધાયું છે, જે પોતાનામાં જ એક રેકોર્ડ સ્તર છે.

દિલ્હી સ્થિત પૂસા સંકુલમાં ગુરુવારે ખરીફ સંમેલન સંબંધિત પત્રકાર પરિષદને સંબોધતા શિવરાજ સિંહ ચૌહાણે જણાવ્યું હતું કે, દેશની ખાદ્ય સુરક્ષા સુનિશ્ચિત કરવી, ખેડૂતોની આજીવિકા વધુ સારી બનાવવી અને દેશવાસીઓને પોષણયુક્ત આહાર ઉપલબ્ધ કરાવવો એ કેન્દ્ર સરકારની સર્વોચ્ચ પ્રાથમિકતા છે.

પૂસામાં શરૂ થયેલા બે દિવસીય રાષ્ટ્રીય ખરીફ અભિયાન-2026માં, દેશભરના કૃષિ મંત્રીઓ, વૈજ્ઞાનિકો અને વરિષ્ઠ અધિકારીઓ ભાગ લઈ રહ્યા છે. આઈસીએઆર, રાજ્યો અને કેન્દ્રશાસિત પ્રદેશોના પ્રતિનિધિઓ પણ આ મહત્વપૂર્ણ મંથનનો ભાગ બન્યા છે. સંમેલનમાં ખરીફ સીઝનની તૈયારીઓ અંગે બે દિવસ સુધી વિગતવાર ચર્ચા અને સમીક્ષા કરવામાં આવશે. તેનો ઉદ્દેશ્ય ખેડૂતોને વધુ સારી યોજના, વધુ સારી ટેકનોલોજી અને વધુ સારું સમર્થન મળે તે છે.

આ પ્રસંગે શિવરાજ ચૌહાણે જણાવ્યું હતું કે, માત્ર અનાજ જ નહીં પરંતુ તેલિબિયાંના ઉત્પાદનમાં પણ દેશે મોટી સિદ્ધિ હાંસલ કરી છે. ચાલુ વર્ષે તેલિબિયાંનું સંભવિત ઉત્પાદન 430.59 લાખ ટન રહેવાનો અંદાજ છે. જેમાં મગફળીનું ઉત્પાદન 130.74 લાખ ટન અને રેપસીડ-સરસવનું ઉત્પાદન 137.68 લાખ ટન સુધી પહોંચી ગયું છે, જે રેકોર્ડ સ્તર છે. તેમણે ઉમેર્યું હતું કે, કઠોળના ઉત્પાદનમાં પણ વધારો નોંધાયો છે અને આગામી સમયમાં ઉત્પાદનમાં વધુ વધારો થવાની સંભાવના છે.

તેમણે જણાવ્યું હતું કે, બાગાયત ક્ષેત્રે દેશ ઝડપથી આગળ વધી રહ્યો છે અને તેમાં અપાર સંભાવનાઓ છે. તેમણે માહિતી આપી હતી કે સંમેલનમાં મિશન ફોર ઇન્ટિગ્રેટેડ ડેવલપમેન્ટ ઓફ હોર્ટિકલ્ચર અને કોટન મિશન પર પણ ચર્ચા થશે. કેન્દ્રીય કૃષિ મંત્રીએ આબોહવા પરિવર્તનને કૃષિ ક્ષેત્ર માટે મોટો પડકાર ગણાવતા કહ્યું કે બદલાતા હવામાન અને અનિયમિત વરસાદને કારણે ખેતીની પરિસ્થિતિઓ ઝડપથી બદલાઈ રહી છે. ગરમી સતત વધી રહી છે, ઘણી વખત એક સાથે અતિશય વરસાદ પડે છે અને પછી લાંબા સમય સુધી વિરામ રહે છે. આવા વાતાવરણમાં ખેતીને સુરક્ષિત અને ટકાઉ બનાવી રાખવા માટે જરૂરી પગલાં પર પણ ચર્ચા કરવામાં આવશે.

કેન્દ્રીય કૃષિ મંત્રીએ જણાવ્યું હતું કે અગાઉ આ સંમેલન માત્ર એક જ દિવસનું યોજાતું હતું, પરંતુ આટલા મોટા દેશમાં એક દિવસમાં સંપૂર્ણ ચર્ચા શક્ય નથી, તેથી હવે પ્રથમ દિવસે અધિકારીઓ જૂથોમાં બેસીને અલગ-અલગ રાજ્યો સાથે વિગતવાર વિચાર-વિમર્શ કરશે અને બીજા દિવસે રાજ્યોના કૃષિ મંત્રીઓ પણ તેમાં જોડાશે.

કેન્દ્રીય કૃષિ મંત્રીએ જણાવ્યું હતું કે, આ વખતે માત્ર નેશનલ કોન્ફરન્સ ઓફ એગ્રીકલ્ચર જ નથી યોજાઈ રહી, પરંતુ પ્રાદેશિક સંમેલનોની પણ શરૂઆત કરવામાં આવી છે. અત્યાર સુધી જયપુર, લખનૌ અને ભુવનેશ્વરમાં ત્રણ પ્રાદેશિક સંમેલનો યોજાઈ ચૂક્યા છે. આ સિવાય વધુ બે સંમેલનો ઉત્તર-પૂર્વ અને દક્ષિણ ભારતમાં આયોજિત કરવામાં આવશે, જેની તારીખો ટૂંક સમયમાં નક્કી કરવામાં આવશે.

હિન્દુસ્થાન સમાચાર / વિજયાલક્ષ્મી / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ