લંડન, નવી દિલ્હી, 06 મે (હિ.સ.) આર્સેનલે શાનદાર પ્રદર્શન કરતા એટ્લેટિકો મેડ્રિડને 1-0 થી હરાવીને 20 વર્ષ બાદ ચેમ્પિયન્સ લીગની ફાઈનલમાં પ્રવેશ કર્યો છે. હોમ ગ્રાઉન્ડ એમિરેટ્સ સ્ટેડિયમમાં રમાયેલી સેમીફાઈનલના બીજા તબક્કામાં બુકાયો સાકા દ્વારા પ્રથમ હાફના અંતે કરવામાં આવેલા ગોલે ટીમને જીત અપાવી.

પ્રથમ તબક્કામાં 1-1 થી ડ્રો રહ્યા બાદ, આર્સેનલે કુલ 2-1 થી આ મુકાબલો પોતાના નામે કર્યો. હવે ફાઈનલમાં તેમનો સામનો પેરિસ સેન્ટ-જર્મન અથવા બાયર્ન મ્યુનિક સામે થશે, જે 30 મેના રોજ બુડાપેસ્ટમાં રમાશે.

આર્સેનલ માટે આ એક ઐતિહાસિક સિદ્ધિ છે, કારણ કે ટીમ 2006 પછી પ્રથમ વખત ચેમ્પિયન્સ લીગની ફાઈનલમાં પહોંચી છે. તે સમયે તેમને બાર્સેલોના સામે હારનો સામનો કરવો પડ્યો હતો. ક્લબ હજુ સુધી આ પ્રતિષ્ઠિત ખિતાબ જીતી શકી નથી.

મેચમાં આર્સેનલે સંયમિત રમત બતાવી હતી. શરૂઆતની મિનિટોમાં એટ્લેટિકોએ આક્રમક શરૂઆત કરી હતી, પરંતુ આર્સેનલે ટૂંક સમયમાં જ નિયંત્રણ મેળવી લીધું હતું. 44મી મિનિટે વિક્ટર ગ્યોકેરેસના શાનદાર મૂવ પર લિએન્ડ્રો ટ્રોસાર્ડએ શોટ માર્યો હતો, જેને ગોલકીપરે રોકી તો લીધો, પરંતુ રીબાઉન્ડ પર સાકાએ તક ઝડપી લઈને ગોલ કરી દીધો.

બીજા હાફમાં એટ્લેટિકોએ વાપસી કરવાનો પ્રયાસ કર્યો હતો, પરંતુ આર્સેનલના મજબૂત ડિફેન્સ અને ગોલકીપરે તેમને સફળ થવા દીધા નહીં.

કોચ મિકેલ આર્ટેટાના નેતૃત્વમાં આર્સેનલ આ સિઝનમાં શાનદાર ફોર્મમાં છે અને હવે પ્રીમિયર લીગની સાથે ચેમ્પિયન્સ લીગનો ખિતાબ જીતવાના આરે ઉભું છે. ટીમ પોતાની અંતિમ ત્રણ લીગ મેચ જીતીને ખિતાબ પણ પોતાના નામે કરી શકે છે.

આ જીત આર્સેનલ માટે મનોવૈજ્ઞાનિક રીતે પણ ખૂબ જ મહત્વપૂર્ણ છે, કારણ કે તાજેતરના વર્ષોમાં ટીમને મોટા મુકાબલાઓમાં નબળી માનસિકતાના આરોપોનો સામનો કરવો પડ્યો હતો. હવે આ ટીમ ઇતિહાસ રચવાથી માત્ર એક ડગલું દૂર છે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / માધવી વ્યાસ