બેવર્લી હિલ્સ, નવી દિલ્હી, 06 મે (હિ.સ.). ફિફા પ્રમુખ જિયાની ઇન્ફેન્ટિનોએ, મંગળવારે વિશ્વ કપ 2026 ની ટિકિટોના વધતા ભાવનો બચાવ કરતા કહ્યું કે વૈશ્વિક ફૂટબોલ સંસ્થા અમેરિકન કાયદાઓનો લાભ લેવા માટે બંધાયેલી છે, જે ટિકિટોને મૂળ કિંમત કરતા અનેકગણી વધુ કિંમતે પુનઃ વેચવાની મંજૂરી આપે છે.

વિશ્વ કપ ટિકિટોના ભાવને લઈને ફિફાની આકરી ટીકા થઈ રહી છે. ચાહક સંગઠન ‘ફૂટબોલ સપોર્ટર્સ યુરોપ’ (એફએસઈ) એ, આ ભાવ નિર્ધારણને “અતિશય” અને “વિશ્વાસઘાત” ગણાવ્યું છે. એફએસઈ એ માર્ચમાં યુરોપિયન કમિશનમાં ફિફા વિરુદ્ધ “ટિકિટના અતિશય ભાવ” અંગે કેસ પણ દાખલ કર્યો હતો.

ફિફાના સત્તાવાર પુનઃવેચાણ પ્લેટફોર્મ ‘ફિફા માર્કેટપ્લેસ’ પર ગયા અઠવાડિયે 19 જુલાઈના રોજ ન્યૂયોર્કમાં રમાનારી ફાઈનલ મેચની ચાર ટિકિટોની કિંમત પ્રતિ ટિકિટ 20 લાખ ડોલરથી વધુ દર્શાવવામાં આવી હતી.

મિલ્કેન ઇન્સ્ટિટ્યૂટ ગ્લોબલ કોન્ફરન્સમાં બોલતા ઇન્ફેન્ટિનોએ કહ્યું કે, આટલી ઊંચી કિંમતો વિશ્વ કપ જોવાની પ્રચંડ માંગ દર્શાવે છે.

તેમણે કહ્યું, “જો કેટલાક લોકો ફાઈનલની ટિકિટો 20 લાખ ડોલરમાં વેચવા માટે મૂકે છે, તો તેનો અર્થ એ નથી કે ટિકિટની અસલી કિંમત આટલી જ છે, અને એ પણ જરૂરી નથી કે કોઈ તેમને ખરીદે.”

ઇન્ફેન્ટિનોએ રમૂજી અંદાજમાં કહ્યું, “જો કોઈ 20 લાખ ડોલરમાં ટિકિટ ખરીદે છે, તો હું પોતે તેને હોટ ડોગ અને કોક આપીશ, જેથી તેનો અનુભવ શાનદાર રહે.”

ચાહક જૂથોએ 2022 કતાર વિશ્વ કપ અને 2026 વિશ્વ કપની ટિકિટોના ભાવની સરખામણી કરતા મોટા તફાવત અંગે પ્રશ્નો ઉઠાવ્યા છે. 2022 માં ફાઈનલની સૌથી મોંઘી ટિકિટ અંદાજે 1600 ડોલર હતી, જ્યારે 2026 માં તેની મૂળ કિંમત લગભગ 11,000 ડોલર સુધી પહોંચી ગઈ છે.

ઇન્ફેન્ટિનોએ આ ભાવોને યોગ્ય ઠેરવતા કહ્યું કે, આ બજારની સ્થિતિને અનુરૂપ છે. તેમણે કહ્યું, “આપણે બજાર પ્રમાણે ચાલવું પડે છે. અમેરિકામાં ટિકિટોનું પુનઃવેચાણ કરવાની મંજૂરી છે, તેથી જો આપણે કિંમત ઓછી રાખીશું તો તે પછીથી વધુ કિંમતે વેચાશે.”

તેમણે જણાવ્યું કે, 2026 વિશ્વ કપ માટે 50 કરોડથી વધુ ટિકિટ અરજીઓ મળી છે, જ્યારે 2018 અને 2022 વિશ્વ કપ માટે કુલ મળીને 5 કરોડથી પણ ઓછી અરજીઓ આવી હતી.

ઇન્ફેન્ટિનોએ એમ પણ કહ્યું કે, ગ્રુપ સ્ટેજની લગભગ 25 ટકા ટિકિટોની કિંમત 300 ડોલરથી ઓછી રાખવામાં આવી છે. તેમણે કહ્યું, “અમેરિકામાં તમે કોઈ કોલેજ રમત પણ 300 ડોલરથી ઓછી કિંમતમાં જોઈ શકતા નથી, અને આ તો વિશ્વ કપ છે.”

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ