તેહરાન, નવી દિલ્હી, 17 જુલાઈ (હિ.સ.). ઈરાનની સશસ્ત્ર સેનાના વરિષ્ઠ પ્રવક્તા બ્રિગેડિયર જનરલ અબોલફઝલ શેકારચીએ, ગુરુવારે (સ્થાનિક સમય) ચેતવણી આપી કે જો દેશના સૈન્ય કેન્દ્રો પર હુમલો થાય છે, તો તેહરાન સમગ્ર પશ્ચિમ એશિયામાં અમેરિકી સૈન્ય ઠેકાણાઓ પર હુમલા કરશે. તેમણે કહ્યું કે, હોર્મુઝ જળસંધિમાં અસુરક્ષાનું મુખ્ય કારણ અમેરિકી સેનાની હાજરી છે. ઈરાન વાયર, ઈસ્લામિક રિપબ્લિક ઓફ ઈરાન બ્રોડકાસ્ટિંગ (આઈઆરઆઈબી) અને ફોક્સ ન્યૂઝના અહેવાલમાં આ માહિતી આપવામાં આવી હતી.

શેકારચીએ આઈઆરઆઈબી પર પ્રસારિત સાક્ષાત્કારમાં કહ્યું કે, અમેરિકા અને ઈઝરાયેલને આ ક્ષેત્રમાં હાજર રહેવાનો કોઈ અધિકાર નથી. હોર્મુઝ જળસંધિ ઈરાનના નિયંત્રણમાં સુરક્ષિત છે. તેમણે આ વ્યૂહાત્મક જળમાર્ગમાં વધતા તણાવ માટે અમેરિકી સેનાની નાકાબંધીને જવાબદાર ઠેરવી. શેકારચીએ પડોશી દેશોને ઈરાનનો સહયોગ કરવા વિનંતી કરી.

પ્રવક્તાએ કહ્યું, જો નુકસાન પહોંચાડવામાં આવે છે, તો ક્ષેત્રનું તમામ અમેરિકી ઇન્ફ્રાસ્ટ્રક્ચર અમારા નિશાન પર હશે. તેમણે કહ્યું, અમે દુશ્મન પર તાકાત સાથે હુમલો કરીશું. અમે વર્ષો સુધી લડી શકીએ છીએ. તેમની આ ટિપ્પણી ઈરાનના ખતમ અલ-અંબિયા સેન્ટ્રલ હેડક્વાર્ટરના પ્રવક્તાની આવી જ ચેતવણી પછી આવી છે. ખતમ અલ-અંબિયા સેન્ટ્રલ હેડક્વાર્ટર ઈરાનનું સૌથી મોટું ઓપરેશનલ કમાન્ડ યુનિટ છે. તે સેના અને ઈસ્લામિક રિવોલ્યુશનરી ગાર્ડ કોર્પ્સ (આઈઆરજીસી) વચ્ચે સૈન્ય અભિયાનમાં તાલમેલ બેસાડે છે.

ખતમ-અલ-અંબિયા સેન્ટ્રલ હેડક્વાર્ટરના નિવેદનમાં કહેવામાં આવ્યું છે કે, અમેરિકાને કોઈપણ સ્થિતિમાં અને કોઈપણ રીતે આ જળમાર્ગમાં દખલ દેવાની પરવાનગી આપવામાં આવશે નહીં. નિવેદનમાં કહેવામાં આવ્યું, અમેરિકાએ ઈરાનના તેલ અને ગેસ નિકાસ માર્ગોને નિશાન બનાવ્યા છે. જો આ સિલસિલો અટકતો નથી તો ક્ષેત્રમાં અમેરિકા અને તેના સહયોગીઓના હિતો સાથે જોડાયેલા તમામ ઇન્ફ્રાસ્ટ્રક્ચરને નષ્ટ કરી દેવામાં આવશે.

આ ધમકી એવા સમયે આવી છે, જ્યારે અમેરિકાએ તાજેતરના દિવસોમાં ઈરાનના દક્ષિણી બંદરોની નૌકાદળ નાકાબંધી ફરીથી શરૂ કરી દીધી છે. ઈરાનના દક્ષિણમાં સૈન્ય ઠેકાણાઓ પર હવાઈ હુમલા તેજ કરી દીધા છે. અમેરિકાના રાષ્ટ્રપતિ ડોનાલ્ડ ટ્રમ્પ ચેતવણી આપી ચૂક્યા છે કે, જો કોઈ સમજૂતી થતી નથી તો અમેરિકી હુમલા ઈરાનના ઇન્ફ્રાસ્ટ્રક્ચર સુધી ફેલાઈ જશે, જેમાં પાવર પ્લાન્ટ અને પુલ પણ સામેલ હશે. અમેરિકી રાષ્ટ્રપતિ ટ્રમ્પે ફોક્સ ન્યૂઝને કહ્યું કે, આગામી સપ્તાહ ઈરાન માટે ખૂબ ખરાબ થવાના છે. અમેરિકા પાવર પ્લાન્ટ અને પુલો પર હુમલા કરશે.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ