ચિસિનાઉ (મોલ્દોવા), નવી દિલ્હી, 21 જુલાઈ (હિ.સ.). ભારતના રાષ્ટ્રપતિ દ્રૌપદી મુર્મુએ, ત્રણ દેશોની રાજકીય યાત્રાનો પ્રથમ તબક્કો મોલ્દોવામાં પૂર્ણ કર્યો. તેઓ હવે ઉત્તર મેસેડોનિયાની બે દિવસીય યાત્રા પર હશે. મુર્મુએ ઉત્તર મેસેડોનિયા જવા રવાના થતા પહેલા ચિસિનાઉમાં આયોજિત રાજકીય ભોજન સમારોહમાં ભાગ લીધો. આ ભોજન સમારોહનું આયોજન તેમના સન્માનમાં મોલ્દોવાના રાષ્ટ્રપતિ માયા સેન્ડુએ કર્યું હતું. રાષ્ટ્રપતિ મુર્મુએ મોલ્ડોવામાં ભારતીય સમુદાયના સભ્યો સાથે પણ વાતચીત કરી.

આ માહિતી ભારતના રાષ્ટ્રપતિ ભવનના સત્તાવાર એક્સ હેન્ડલ પર શેર કરવામાં આવી હતી. એક્સ પોસ્ટમાં જણાવાયું હતું કે, રાષ્ટ્રપતિ દ્રૌપદી મુર્મુ ઉત્તર મેસેડોનિયા જવા રવાના થતા પહેલા ચિસિનાઉમાં મોલ્દોવાના રાષ્ટ્રપતિ દ્વારા તેમના સન્માનમાં આયોજિત ભોજન સમારોહમાં સામેલ થયા. અન્ય એક એક્સ પોસ્ટ અનુસાર, મુર્મુએ ચિસિનાઉમાં ભારતીય સમુદાયના સભ્યો સાથે વાતચીત કરી. ભારતીય સમુદાયે તેમનું ઉષ્માભર્યું અને ઉત્સાહપૂર્વક સ્વાગત કર્યું.

એ નોંધનીય છે કે, કોઈપણ ભારતીય રાષ્ટ્રપતિની મોલ્દોવાની આ પ્રથમ યાત્રા છે. ઉત્તરી મેસેડોનિયાનો પ્રવાસ પૂર્ણ કરીને તેઓ રોમાનિયા પહોંચશે. તેમણે મોલ્દોવાના રાષ્ટ્રપતિ સાથે દ્વિપક્ષીય બેઠક કરી અને પ્રતિનિધિમંડળ સ્તરની વાતચીતનું નેતૃત્વ કર્યું. રાષ્ટ્રપતિ મુર્મુ સાથેની રાજકીય યાત્રામાં ગ્રાહક બાબતો, ખાદ્ય અને જાહેર વિતરણ રાજ્યમંત્રી નિમુબેન જયંતિભાઈ બાંભણિયા, રાજ્યસભાના સભ્ય ડો. દિનેશ શર્મા અને લોકસભાના સભ્ય વિજય બઘેલ પણ છે.

20 જુલાઈની સવારે ચિસિનાઉ આંતરરાષ્ટ્રીય હવાઈ મથકે પહોંચતા રાષ્ટ્રપતિ મુર્મુનું સ્વાગત મોલ્દોવાના ઉપપ્રધાનમંત્રી અને વિદેશમંત્રી મિહાઈ પોપસોઈ દ્વારા કરવામાં આવ્યું. રાષ્ટ્રપતિ મુર્મુનું પ્રેસિડેન્શિયલ પેલેસમાં મોલ્દોવાના રાષ્ટ્રપતિ માયા સેન્ડુએ ઉષ્માભર્યું સ્વાગત કર્યું. તેમને ગાર્ડ ઓફ ઓનર આપવામાં આવ્યું. રૂબરૂ બેઠક અને પ્રતિનિધિમંડળ સ્તરની વાતચીત દરમિયાન, બંને નેતાઓએ દ્વિપક્ષીય ભાગીદારીના તમામ પાસાઓ પર સાર્થક અને ભવિષ્યલક્ષી ચર્ચા કરી.

બંને નેતાઓ પરસ્પર હિતના વિવિધ ક્ષેત્રોમાં સહયોગ વધારવા સંમત થયા. આમાં કૃષિ, લોજિસ્ટિક્સ અને ઇન્ફ્રાસ્ટ્રક્ચર, હેલ્થકેર અને ફાર્માસ્યુટિકલ્સ, નવીનીકરણીય ઊર્જા, ડિજિટલ પબ્લિક ઇન્ફ્રાસ્ટ્રક્ચર, આર્ટિફિશિયલ ઇન્ટેલિજન્સ અને નવીનતાનો સમાવેશ થાય છે. ભારતના રાષ્ટ્રપતિએ ભારત-મોલ્ડોવા બિઝનેસ ફોરમને પણ સંબોધિત કર્યું. રાષ્ટ્રપતિએ કહ્યું કે, 2047 સુધીમાં વિકસિત રાષ્ટ્ર બનવાના સંકલ્પ તરફ આગળ વધી રહેલું ભારત એવી ભાગીદારીને આગળ વધારવા માંગે છે, જે વિશ્વાસ અને સહિયારી સમૃદ્ધિ પર આધારિત હોય.

હિન્દુસ્થાન સમાચાર / મુકુંદ

હિન્દુસ્થાન સમાચાર / ડો.હિતેશ એન.વ્યાસ